काँग्रेसचे विधिमंडळ नेते विजय वडेट्टीवार यांनी मराठा आंदोलनाचे नेते मनोज जरांगे यांच्यावर तीव्र शब्दप्रहार केला. बालिश बुद्धी असणाऱ्यांना दुसरे शब्द सुचत नाहीत, असा टोला लगावला. राहुल गांधींवरील जरांगेंच्या टीकेला प्रत्युत्तर देताना वडेट्टीवारांनी परखड भाषेत राजकीय बालिशपणावर प्रहार केला.
काँग्रेसचे ज्येष्ठ नेते विजय वडेट्टीवार यांनी आपल्या तिखट शब्दांनी राजकीय रणभूमीवर पुन्हा एकदा आग पेटवली आहे. मराठा आंदोलनकर्ते मनोज जरांगे यांनी राहुल गांधींवर ‘लाल्या’ अशी टीका केली. त्यानंतर वडेट्टीवारांनी जरांगेंच्या बालिश वक्तव्याला सणसणीत प्रत्युत्तर दिले. त्यांच्या धारदार टीकेने केवळ जरांगे नाही. तर केंद्र सरकार आणि ओबीसी समाजावरील अन्यायालाही लक्ष्य केले. शेतकऱ्यांच्या हितासाठी आणि ओबीसी समाजाच्या अस्मितेसाठी वडेट्टीवारांनी आपला निर्धार दाखवत, आगामी निवडणुकीच्या रणनीतीचा पायाच भक्कम केला.
वडेट्टीवारांनी जरांगेंच्या टीकेवर पलटवार करताना म्हटले की, ज्यांची बुद्धी बालीश आहे, त्यांना बालिशपणाच शोभतो. जरांगेंच्या शब्दांना त्यांनी त्यांच्याच भाषेत उत्तर देत, त्यांच्या वक्तव्याचा खरपूस समाचार घेतला. शिवसेनेच्या चिन्हाचा वाद न्यायप्रविष्ट असल्याचे सांगितले. वडेट्टीवारांनी संविधान आणि कायद्याच्या राजवटीवर विश्वास व्यक्त केला. त्यांनी स्पष्ट केले की, संविधानाच्या मार्गाने होणारे निर्णयच भावी पिढ्यांना दिशा देणारे ठरतील. त्यांच्या या शब्दांनी काँग्रेसचा न्याय आणि समतेचा लढा पुन्हा एकदा स्पष्ट झाला.
ओबीसी समाजाचा आक्रोश
वडेट्टीवारांनी ओबीसी समाजातील असुरक्षिततेच्या भावनेवर बोट ठेवले. सरकारच्या 2 सप्टेंबरच्या निर्णयाने ओबीसी समाजात अस्वस्थता पसरली आहे. काही आत्महत्यांच्या घटनांनी ही वेदना उघड झाली आहे. सरकारच्या ओबीसी समाजावरील कथित प्रेमाचा पर्दाफाश केला. वडेट्टीवारांनी आरक्षणाच्या मुद्द्यावर समाजाला होणारा अन्याय अधोरेखित केला. 10 ऑक्टोबरला नागपुरात होणाऱ्या ओबीसी आरक्षणाच्या महामोर्चात सहभागी होणाऱ्या प्रत्येकाचे स्वागत केले. ते कार्यकर्ता आणि नेता म्हणून समाजासोबत खांद्याला खांदा लावून लढणार असल्याचे त्यांनी जाहीर केले.
Maratha OBC Controversy : भुजबळांचा राग, राष्ट्रवादीची प्रतिमा धोक्यात?
पंतप्रधानांच्या मुंबई दौऱ्यावर टीका केली. वडेट्टीवारांनी नवी मुंबई विमानतळ आणि मेट्रो प्रकल्पाच्या उद्घाटनाला निवडणुकीच्या तोंडावरचा इव्हेंटबाजीचा भाग ठरवला. अपूर्ण प्रकल्पांचे उद्घाटन म्हणजे केवळ श्रेय लाटण्याचा खटाटोप असल्याचा आरोप त्यांनी केला. शेतकऱ्यांसाठी मोठ्या पॅकेजची मागणी केली. अतिवृष्टीने बाधित बळीराजाला दिलासा देण्याचे आवाहन त्यांनी पंतप्रधानांना केले. महापालिका निवडणुकीच्या तयारीत काँग्रेसचा झंजावात दाखवला. वडेट्टीवारांनी शेतकरी आणि ओबीसी समाजाच्या हक्कांसाठी लढण्याचा निर्धार व्यक्त केला.
