वर्धा, गोंदिया, भंडारा जिल्ह्यात विकासाची नवी सुरुवात झाली आहे. राज्यमंत्री डॉ. पंकज भोयर यांनी रिक्त पदभरतीला वेग देत जनतेत नवी आशा निर्माण केली आहे.
भंडारा जिल्ह्याचे पालकमंत्री आणि शालेय शिक्षण राज्यमंत्री डॉ. पंकज भोयर यांनी आपल्या भूमिकेत एक नवा अध्याय सुरू केला आहे. गेल्या काही काळापासून या जिल्ह्याला ‘गृह जिल्हा’ असण्याचा लाभ कमी मिळाला आहे कारण अनेक पालकमंत्र्यांचा संबंध इतर जिल्ह्यांशी राहिला होता. परिणामी, भंडारा जिल्ह्याचा विकास मागे पडला. त्यासाठी राजकीय वर्तुळात चर्चाही रंगल्या. नव्या पालकमंत्र्यांबाबतही राजकीय वर्तुळात तसेच नागरिकांमध्ये प्रश्न उपस्थित झाले होते. हे फक्त औपचारिकतेसाठीच असतील का, की प्रत्यक्षात जिल्ह्याच्या प्रगतीसाठी काम करतील? या शंकांना उत्तर देताना, डॉ. पंकज भोयर यांनी स्पष्टपणे संकेत दिले आहेत की त्यांनी केवळ पदभार स्वीकारला नाही, तर विकासाला वेग देण्यासाठी कृतीही सुरू केली आहे.
जिल्ह्यातील रिक्त पदे भरण्याच्या प्रक्रियेला गती देण्याचे ठोस पाऊल उचलताना डॉ. भोयर यांनी शालेय शिक्षण विभागाला स्पष्ट निर्देश दिले आहेत. त्यांच्या नेतृत्वाखाली नुकतीच मुंबईत मंत्रालयात एक महत्त्वपूर्ण आढावा बैठक पार पडली. या बैठकीत त्यांनी वर्धा, गोंदिया आणि भंडारा जिल्ह्यांतील गट-अ, गट-ब आणि गट-क दर्जाच्या रिक्त पदांचा सखोल आढावा घेतला. या बैठकीला नागपूर विभागीय शिक्षण उपसंचालक डॉ. माधुरी सावरकर यांच्यासह अनेक वरिष्ठ अधिकारी उपस्थित होते. डॉ. भोयर यांनी या रिक्त पदांमुळे निर्माण झालेल्या अडचणी आणि त्याचा स्थानिक शिक्षण व्यवस्थेवर होणारा परिणाम यावर सविस्तर चर्चा केली. त्यांनी या पदांच्या भरती प्रक्रियेला तातडीने सुरुवात करण्याचे आदेश दिले. जेणेकरून शिक्षण क्षेत्रातील रिक्त जागा लवकरात लवकर भरल्या जाव्यात.
भरतीसाठी तत्पर कार्यवाही
डॉ. पंकज भोयर यांच्या या निर्णयामुळे भंडारा, वर्धा आणि गोंदिया जिल्ह्यातील जनतेत आशेचा किरण निर्माण झाला आहे. गेल्या काही वर्षांपासून रिक्त पदांमुळे शिक्षण, प्रशासन आणि इतर सेवांवर विपरीत परिणाम झाला होता. विशेषत: ग्रामीण भागातील शाळांमध्ये शिक्षकांच्या कमतरतेमुळे विद्यार्थ्यांचे शैक्षणिक नुकसान होत होते. या समस्येला हात घालत डॉ. भोयर यांनी केवळ प्रशासकीय कारभारच नव्हे, तर स्थानिक तरुणांना रोजगाराच्या संधी उपलब्ध करून देण्याचा मानस व्यक्त केला आहे. त्यांच्या या पावलामुळे स्थानिक तरुणांमध्ये उत्साहाचे वातावरण आहे. कारण रिक्त पदांच्या भरतीमुळे अनेकांना नोकरीच्या नव्या संधी उपलब्ध होणार आहेत.
Harshwardhan Sapkal : उद्घाटनात रंगले मोदी, पूरग्रस्त शेतकरी मात्र उपाशी
डॉ. भोयर यांचा हा निर्णय केवळ प्रशासकीय पातळीवरच नव्हे, तर सामाजिक आणि आर्थिक दृष्टिकोनातूनही महत्त्वपूर्ण आहे. भंडारा, वर्धा आणि गोंदिया हे जिल्हे प्रामुख्याने ग्रामीण आणि आदिवासी भागांनी व्यापलेले आहेत. या भागांतील रिक्त पदे भरण्यामुळे स्थानिक स्तरावर विकासाला चालना मिळेल आणि शिक्षणाचा दर्जा सुधारेल. याशिवाय, या निर्णयामुळे स्थानिक जनतेचा सरकारवरील विश्वासही दृढ होण्यास मदत होईल. डॉ. भोयर या आढावा बैठकीत केवळ निर्देश देऊनच थांबले नाहीत. तर संबंधित अधिकाऱ्यांना या प्रक्रियेची अंमलबजावणी जलदगतीने आणि पारदर्शकपणे करण्याचे स्पष्ट आदेश दिले आहेत.
