महाराष्ट्राच्या राजकीय वर्तुळात स्थानिक निवडणुकीचे वारे वेगाने वाहत असताना बदलत्या राजकीय समीकरणांच्या पार्श्वभूमीवर काँग्रेस प्रदेशाध्यक्ष हर्षवर्धन सपकाळ यांच्या एका हालचालीने सर्वांचे लक्ष वेधून घेतले आहे.
महाराष्ट्राच्या राजकीय वातावरणात सध्या स्थानिक स्वराज्य संस्थांच्या निवडणुकींचा धुमाकूळ सुरू आहे. प्रत्येक पक्ष आपली कंबर कसून, मोर्चेबांधणी, दौरे आणि बैठकींमध्ये व्यस्त आहे. पक्षांतराच्या मालिका तर रोजच सुरू आहे. अशा तापलेल्या वातावरणात एका घटनेने सर्वांचे लक्ष वेधले आहे. काँग्रेसचे ज्येष्ठ कार्यकर्ते प्रकाशमामा पगारे यांच्याशी संबंधित. कल्याणमध्ये काँग्रेस प्रदेशाध्यक्ष हर्षवर्धन सपकाळ यांच्या नेतृत्वाखाली एक मोठे आंदोलन झाले. मात्र या आंदोलनात झालेल्या एका दृश्याने सर्वांचे लक्ष वेधले. या आंदोलनात थेट सपकाळ यांनी प्रकाशमामा पगारे यांना खांद्यावर उचलून मंचावर नेले. जणू काही पक्षाची एकजूट आणि आदर दाखवण्याचा अनोखा मार्ग निवडला. हे आंदोलन दोन मुख्य कारणांसाठी होते.
एक म्हणजे सर्वोच्च न्यायालयाचे सरन्यायाधीश भूषण गवई यांच्या दिशेने वकीलाने बूट फेकल्याच्या घटनेचा निषेध. दुसरे म्हणजे प्रकाशमामा पगारे यांचा भाजप कार्यकर्त्यांकडून झालेला अपमान. डोंबिवलीत भाजपच्या पदाधिकाऱ्यांनी पगारे मामांना भर रस्त्यात साडी नेसवली होती. या घटनेने काँग्रेस पक्ष चांगलाच संतप्त झाला आणि त्यांनी या अपमानाचा जोरदार निषेध केला. हर्षवर्धन सपकाळ यांनी खांद्यावर घेऊन मंचावर नेल्याने, पक्ष प्रकाशमामा यांच्या पाठीशी खंबीरपणे उभा असल्याचे संदेश दिला. प्रकाशमामा पगारे यांनी पंतप्रधान नरेंद्र मोदी यांच्याबाबत सोशल मीडियावर एक आक्षेपार्ह पोस्ट फॉरवर्ड केली होती. ती पोस्ट त्यांना कोणीतरी पाठवली होती. त्यांनी ती पुढे शेअर केली. यावरून भाजपचे जिल्हाध्यक्ष नंदू परब आणि पदाधिकारी संदीप माळी यांनी पगारे मामांना रस्त्यात गाठले आणि साडी नेसवली.
पक्षाच्या एकजुटीचे प्रतीक
संपूर्ण घटनेचा व्हिडीओ सोशल मीडियावर व्हायरल झाला. या अपमानामुळे पगारे मामांचा रक्तदाब वाढला आणि त्यांना तातडीने रुग्णालयात दाखल करण्यात आले. काँग्रेस पक्ष या प्रकरणी आक्रमक झाला आणि जिल्हाध्यक्ष सचिन पोटे यांनी पगारे मामांसोबत पोलिस उपायुक्तांची भेट घेतली. त्यांनी भाजप पदाधिकाऱ्यांविरोधात कठोर कारवाईची मागणी केली. या घटनेनंतर काँग्रेसचे नेते हर्षवर्धन सपकाळ यांनीही प्रकाशमामा यांच्याशी संवाद साधला आणि त्यांना धीर दिला. पण यापूर्वीच लोकसभेतील विरोधी पक्षनेते राहुल गांधी यांनीही या प्रकरणात हस्तक्षेप केला होता. राहुल गांधींनी प्रकाशमामा पगारे यांच्याशी फोनवर बोलून म्हटले होते, मामा, तुम्ही घाबरू नका. काँग्रेस तुमच्या सोबत आहे. बाळासाहेब थोरातांनी तुमच्याबद्दल माहिती दिली आहे.
तुम्ही 50 वर्षांपासून काँग्रेसचे निष्ठावान कार्यकर्ते आहात. तुमचा आम्हाला खूप आदर आहे. हे शब्द प्रकाशमामा यांच्यासाठी प्रेरणादायी ठरले आणि पक्षाच्या एकजुटीचे प्रतीक बनले. या संपूर्ण प्रकरणाने महाराष्ट्राच्या राजकारणात नवे वळण आले आहे. एकीकडे भाजपच्या पदाधिकाऱ्यांनी केलेला अपमान हा राजकीय वैराचे उघडे प्रदर्शन होते, तर दुसरीकडे काँग्रेसने त्याला सत्काराने उत्तर देऊन पक्षाच्या कार्यकर्त्यांचा सन्मान कसा करावा, हे दाखवले. आंदोलनात सर्वोच्च न्यायालयाच्या घटनेचाही निषेध करण्यात आला. ज्यात सरन्यायाधीश भूषण गवई यांच्या दिशेने बूट फेकण्याच्या कृत्याचा कडक शब्दांत विरोध व्यक्त करण्यात आला. हे आंदोलन केवळ निषेध नव्हते, तर राजकीय शक्तिप्रदर्शनही होते. कल्याणमध्ये जमलेल्या कार्यकर्त्यांनी जोरदार घोषणा दिल्या आणि पक्षाच्या नेत्यांनी भाषणे करून वातावरण तापवले.
Nagpur Police : ‘ऑपरेशन शक्ती’ने उद्ध्वस्त केला देहव्यवसायाचा गड
