बिहारच्या राजकीय पटावर नव्या हालचालींना सुरुवात झाली आहे. आगामी विधानसभा निवडणुकींच्या पार्श्वभूमीवर जेडीयूने आपल्या रणनितीचा पहिला टप्पा सुरू केला आहे.
बिहारच्या राजकारणात पुन्हा एकदा हालचालींना वेग आला आहे. सत्तेच्या आकांक्षा, पक्षांतराची कुजबुज आणि आघाड्यांच्या नव्या घडामोडींनी राजकीय पटावर उत्सुकतेचं वातावरण निर्माण झालं आहे. प्रत्येक पक्ष आपलं संघटन नव्याने सुसज्ज करत, कार्यकर्त्यांच्या उर्जेला धार देत आहे. पुढील काही काळात निवडणूक रंगमंच सजणार असल्याची जाणीव राजकीय वर्तुळांना झाली आहे. राजकारणातील हे तापमान जसजसं वाढतंय, तसतसे पक्ष आपल्या रणनितीच्या चाली उघड करत आहेत. मतदारसंघनिहाय समीकरणं, उमेदवारांची निवड आणि सामाजिक संतुलनाचं गणित, या सर्वांचा मिलाफ आता अधिक रंगतदार होऊ लागला आहे.
राजकीय गदारोळाच्या या पार्श्वभूमीवर जनता दल (युनायटेड) ने बुधवारी आपली पहिली उमेदवार यादी जाहीर करत निवडणूक रणसंग्रामाचा पहिला बिगुल वाजवला आहे. या यादीत एकूण 57 उमेदवारांचा समावेश आहे. ज्यातून पक्षाने प्रादेशिक संतुलन आणि सामाजिक विविधतेचा उत्कृष्ट संगम साधण्याचा प्रयत्न केला आहे. तीन बाहुबली नेते, मोकामाचे अनंत सिंह, एकमाचे धुमल सिंह आणि कुचाकोटचे अमरेंद्र पांडे, यांना पुन्हा मैदानात उतरवण्यात आलं आहे. याशिवाय, दहा अनुसूचित जातींच्या उमेदवारांना तिकीट देऊन सामाजिक प्रतिनिधित्वाची बांधिलकी जेडीयूने स्पष्ट केली आहे.
जुन्या योद्ध्यांचे पुनरागमन
उमेदवारांच्या या यादीत अनुभवी नेत्यांचा सन्मान राखत काही जुने योद्धे पुन्हा रणांगणात उतरले आहेत. मंत्री विजय चौधरी यांना सराईरंजनमधून उमेदवारी देत पक्षाने त्यांच्यावरचा विश्वास कायम ठेवला आहे. हिल्सामधून कृष्णा मुरारी शरण उर्फ प्रेम मुखिया यांना पुन्हा उमेदवारी मिळाली आहे. 2020 मध्ये केवळ 12 मतांनी विजय मिळवलेल्या या उमेदवारावर जेडीयूला विशेष भरोसा आहे. तर मंत्री महेश्वर हजारी यांचे तिकीट कापले जाण्याच्या अफवा असूनही त्यांना कल्याणपूरमधून पुन्हा संधी मिळाली आहे.
जेडीयूला या वेळी तब्बल 500 अर्ज प्राप्त झाले होते. तरीदेखील, निवड प्रक्रियेत ‘गुणवत्ता आणि निष्ठा’ यांनाच प्राधान्य दिलं गेलं. नितीश कुमार यांनी आपल्या सहकाऱ्यांना स्पष्ट संदेश दिला आहे. या निवडणुकीत जेडीयूला सर्वात मोठा पक्ष बनवायचं आहे. पक्षाने या वेळी 101 जागांवर निवडणूक लढवण्याचा निर्णय घेतला आहे. 2020 मधील निवडणुकीत लढवलेल्या 115 जागांच्या तुलनेत ही रणनीती अधिक परिपक्व आणि नियोजनबद्ध मानली जात आहे.
एनडीएने अधिकृतरीत्या जाहीर केल्याप्रमाणे, आगामी निवडणूक नितीश कुमार यांच्या नेतृत्वाखाली लढवल्या जाणार आहेत. सुरुवातीच्या गोंधळानंतर आता भाजपसह एलजेपी (आर) आणि एचएएम या सहयोगी पक्षांनीही त्यांच्या नेतृत्वाला पूर्ण पाठिंबा दर्शवला आहे. ‘2025 ते 2030, पुन्हा नितीश’ हा पक्षाचा नारा बिहारच्या राजकीय वाऱ्यांना वेग देतो आहे. जेडीयूच्या या यादीमुळे बिहारच्या सत्तासमीकरणात नवी दिशा निर्माण झाली आहे. अनुभवी नेतृत्व, नव्या चेहऱ्यांचा उत्साह आणि स्पष्ट राजकीय संदेश. या तिन्हींच्या संगमातून जेडीयूने निवडणुकीच्या पटावर पहिली आणि प्रभावी चाल खेळली आहे.
