राज्यातील नगरपरिषद निवडणुकींच्या तयारीत मतदारयादीतील गोंधळाने खळबळ उडवली आहे. घुग्घुस आणि राजुरा शहरांतील यादीत एकाच व्यक्तीचं नाव अनेक ठिकाणी दिसल्याने नागरिकांमध्ये संतापाचं वातावरण आहे.
राज्यातील नगरपरिषद निवडणुकींच्या तयारीच्या पार्श्वभूमीवर एक अनोखा प्रकार समोर आला आहे. नागरिकांमध्ये आश्चर्य आणि संतापाचं वातावरण आहे. काहींच्या हातात तीन वेगवेगळ्या क्रमांकांची यादी पोहोचली तर काहींचं नाव त्यांनी राहात असलेल्या भागातच नाही. अशा प्रकारच्या त्रुटीमुळे प्रशासनाच्या कार्यपद्धतीबद्दल पुन्हा एकदा शंका निर्माण झाली आहे. मतदारांमध्ये संभ्रम आणि तक्रारींचा पाऊस सुरू झाला आहे.
घुग्घुस आणि राजुरा या दोन्ही शहरांत प्रारूप मतदारयादी जाहीर होताच या त्रुटींचा स्फोट झाला. नागरिकांकडून मिळालेल्या माहितीप्रमाणे, काही व्यक्तींची नावे एकाच यादीत वेगवेगळ्या क्रमांकांनी पुन्हा पुन्हा आढळली आहेत. तर काहींचं वास्तव्य एका प्रभागात असूनसुद्धा त्यांचं नाव दुसऱ्या प्रभागातील मतदारयादीत आढळलं. ही परिस्थिती तांत्रिक चूक तर दर्शवतेच, पण निवडणूक प्रक्रियेतील पारदर्शकतेवर डागसुद्धा ठरते.
‘त्रिनाम’ गोंधळ
घुग्घुस शहरात एकाच व्यक्तीचं नाव तीन ठिकाणी आढळल्याचा प्रकार समोर आला आहे. ही घटना स्थानिक प्रशासनाच्या निष्काळजीपणाचं उदाहरण ठरली आहे. प्रारूप यादी जाहीर होताच नागरिकांनी हरकती दाखल करण्यासाठी धाव घेतली. इतक्या मोठ्या संख्येने हरकती दाखल झाल्याने प्रशासनाने हरकती स्वीकृतीची मुदत 17 ऑक्टोबर 2025 पर्यंत वाढवावी लागली. शहर काँग्रेसचे अध्यक्ष राजू रेड्डी यांनी या घोळावर तीव्र नाराजी व्यक्त केली आहे. तसेच संपूर्ण मतदारयादीची पुनर्तपासणी करण्याची मागणी केली आहे.
राजुरा शहरात तर आणखी वेगळा प्रकार समोर आला. काही नागरिक एका प्रभागात वास्तव्यास असताना त्यांच्या नावांची नोंद दुसऱ्या प्रभागातील यादीत झाली आहे. त्यामुळे अनेक मतदार आपल्या नावाबाबतच गोंधळले आहेत. भाजप शहराध्यक्ष सुरेश रागीट, माजी सभापती राधेश्याम अडानिया, महामंत्री मिलिंद देशकर आणि भाजयुमो अध्यक्ष प्रफुल्ल घोटेकर यांनी निवडणूक प्रशासनाकडे लेखी तक्रार नोंदवली आहे. या त्रुटी तातडीने दुरुस्त केल्या नाहीत, तर मतदानाच्या दिवशीच मोठा गोंधळ निर्माण होईल, अशी चिंता व्यक्त केली जात आहे.
मतदारयादी ही लोकशाहीच्या प्रक्रियेतील सर्वात महत्त्वाची पायरी आहे. त्यात झालेल्या छोट्या त्रुटीही नागरिकांच्या अधिकारावर परिणाम करतात. घुग्घुस आणि राजुरा या दोन्ही ठिकाणच्या घटनांनी निवडणूक यंत्रणेच्या पारदर्शकतेला धक्का दिला आहे. नागरिकांच्या मूलभूत अधिकारांचा सन्मान राखण्यासाठी आणि निवडणुकीचा विश्वास अबाधित ठेवण्यासाठी प्रशासनाने या चुका तातडीने दुरुस्त करून मतदारयादी शुद्धीकरणाचे काम हाती घेणं आवश्यक ठरतंय. या घटनांनी लोकशाहीच्या कागदी नोंदीतूनच गोंधळाचा मोठा पगडा निर्माण केला आहे.
