नागपूरच्या रामदास पेठेतील मेडिट्रिना रुग्णालयात सध्या मोठ्या घडामोडी घडत आहेत. डॉ. समीर पालतेवार यांची पोलीस कोठडी 18 ऑक्टोबरपर्यंत वाढवण्यात आली आहे, तर तपासाची गती वाढली आहे.
नागपूरच्या रामदास पेठेतील मेडिट्रिना रुग्णालय, जे स्थापनेपासूनच वादांच्या वादळात अडकलेले आहे. आता एका मोठ्या आर्थिक घोटाळ्याच्या केंद्रस्थानी आले आहे. या रुग्णालयाचे सह-संचालक डॉ. समीर पालतेवार यांना सीताबर्डी पोलिसांनी अटक केली. यानंतर न्यायालयाने त्यांची पोलीस कोठडी शनिवार, 18 ऑक्टोबरपर्यंत वाढवली आहे. हा घोटाळा इतका गुंतागुंतीचा आहे की, त्यात सरकारी योजनांचा दुरुपयोग, बनावट बिले आणि शेल कंपन्यांचा वापर असे अनेक काळे अध्याय दडलेले आहेत. रुग्णालयाचे संस्थापक गणेश चक्करवार यांनी दिलेल्या तक्रारीवरून हा सगळा प्रकार उघडकीस आला. ज्यामुळे डॉ. पालतेवारांच्या कारस्थानांचा पर्दाफाश झाला.
मेडिट्रिना रुग्णालयात गरीब रुग्णांना विविध सरकारी योजनांचा लाभ मिळतो. जसे की आयुष्मान भारत किंवा इतर आरोग्य योजना. या योजनांतर्गत रुग्णांवर उपचार करून रुग्णालय स्वतःचा खर्च उचलते नंतर सरकारकडून निधी मिळवते. हा निधी रुग्णालयाच्या अधिकृत बँक खात्यात जमा होणे अपेक्षित असते. पण डॉ. पालतेवारांनी हा पैसा अवैधरित्या आपल्या शेल कंपन्यांकडे वळवला, असा गंभीर आरोप चक्करवार यांनी केला आहे. यामुळे रुग्णांच्या विश्वासाचा भंग झाला आहे. पोलिसांनी फसवणुकीचे गुन्हे दाखल करत डॉ. पालतेवारांना अटक केली आणि न्यायालयात हजर केले. न्यायालयाने पोलीस तपासासाठी कोठडी वाढवली. जेणेकरून या गुंतागुंतीच्या जाळ्यातील इतर धागेही उघडे पडतील.
Devendra Fadnavis : जप्त शस्त्रांच्या मागची पुरवठा साखळी उलगडणार
जाळ्यात अडकलेले चेहरे
हा घोटाळा सुरू झाला तो रुग्णालयाच्या भागीदारीतून. नवीन इस्पितळ बांधकामासाठी नियमांनुसार डॉक्टरकडे किमान 67 टक्के शेअर्स असणे आवश्यक होते. त्यामुळे व्यवसायाने चार्टर्ड अकाउंटंट असलेले गणेश चक्करवार यांनी आपले 17 टक्के शेअर्स तात्पुरते बुक व्हॅल्यूवर ट्रान्सफर करून डॉ. पालतेवारांच्या पत्नी सोनाली पालतेवारांना अतिरिक्त संचालक बनवले. ही एक विश्वासाची साथ होती. पण डॉ. पालतेवार दांपत्याने त्याचा गैरफायदा घेतला. त्यांनी मुलगा निनादसोबत मिळून ‘ऑब्व्हिएट हेल्थकेअर प्रा. लि.’ नावाची शेल कंपनी स्थापन केली आणि मनमानीला सुरुवात केली.
2020-21 मध्ये मेडिट्रिनाच्या खात्यातून 2 कोटी. 2021-22 मध्ये 2.91 कोटी. 2022-23 मध्ये 3.36 कोटी आणि 2023-24 मध्ये 3.13 कोटी असे एकूण 11.41 कोटी रुपये काढून घेतले गेले. हे पैसे डिजिटल मार्केटिंग आणि जाहिरातींच्या नावाखाली बनावट बिले तयार करून वळवले गेले. चक्करवार यांनी वार्षिक अहवाल तपासला तेव्हा हा प्रकार उघड झाला. ते म्हणतात, मला याची कुठलीही कल्पना नव्हती. हे पैसे रुग्णांच्या उपचारांसाठी होते, पण वैयक्तिक स्वार्थासाठी लुटले गेले. हा गैरव्यवहार नैतिकतेचाही होता. ज्यामुळे रुग्णालयाची प्रतिष्ठा मातीमोल झाली.
सहआरोपींची यादी
घोटाळ्यात डॉ. पालतेवार एकटे नव्हते. त्यांच्यासोबत अनेक सहआरोपींनी मदत केली. रुग्णालयाचे अंकेक्षण अधिकारी अर्पण पांडे, किशोर पांडे, अभिषेक पांडे. यांच्यासह ॲबस्ट्रॅक्ट आयटी ग्रुप, आकाश केदारची ‘एके हेल्थकेअर सर्व्हिसेस’, मुकेश बडवाईकची ‘एमबी हेल्थ केअर सर्व्हिसेस’ यांचा समावेश आहे. याशिवाय वैशाली बडवाईक, तृप्ती घोडे, रिता बडवाईक, कल्याणी बडवाईक, नईम दिवाण, सर्वेश ढोमणे, प्रियंका ढोमणे यांच्या ‘पी.एस. हेल्थ केअर सर्व्हिसेस’ आणि ‘अलाईड हेल्थकेअर सर्व्हिसेस’ या कंपन्यांच्या खात्यात कोट्यवधी रुपये बेकायदेशीरपणे जमा करण्यात आले. चक्करवार यांच्या तक्रारीवरून पोलिसांनी या सर्वांना सहआरोपी केले आहे. या प्रकरणाने बनावट कागदपत्रे, विश्वासघात आणि सरकारी निधीच्या दुरुपयोगाचे गंभीर स्वरूप घेतले आहे.
पोलिस तपासात हे पैसे कसे वळवले गेले. कोणत्या योजनांचा लाभ घेतला गेला रुग्णांवर याचा काय परिणाम झाला, याची सखोल चौकशी होत आहे. नागपूरसह महाराष्ट्रातील आरोग्य क्षेत्रात हा घोटाळा एक धडा ठरला आहे. जिथे विश्वास आणि पैसा यांच्यातील सीमारेषा पुसली गेली. हा प्रकार उघड झाल्यानंतर रुग्णालयातील कर्मचारी आणि रुग्णांमध्ये खळबळ उडाली आहे. सरकारी योजनांचा आधार घेऊन गरीबांना मदत करण्याचे उद्दिष्ट असताना, ते स्वतःच्या खिशात भरण्याचे साधन बनले. डॉ. पालतेवारांच्या कोठडीत वाढ झाल्याने तपासाला गती मिळाली आहे. लवकरच इतर आरोपींनाही अटक होण्याची शक्यता आहे.
