राज्यात सध्या स्थानिक निवडणुकीमुळे राजकीय वातावरण तापलेले आहे. सातत्याने पक्षांमध्ये उलथापालथीचे वारे देखील वाहत आहेत.
महाराष्ट्राच्या राजकारणात सध्या स्थानिक स्वराज्य संस्थांच्या निवडणुकीची धामधूम सुरू आहे. प्रत्येक पक्ष आपली कंबर कसून मैदानात उतरत आहे. अशा वेळी पक्षांतर्गत उलथापालथी आणि नियुक्त्यांच्या खेळांनी वातावरण आणखी तापले आहे. नागपूर जिल्ह्यात तर एका नियुक्तीने खळबळ उडाली आहे. अमरावतीच्या आमदार सुलभा खोडके यांची नागपूर सुधार प्रन्यासच्या विश्वस्तपदासाठी शिफारस करण्यात आली आहे. राष्ट्रवादी काँग्रेसच्या या निर्णयाने स्थानिक पदाधिकाऱ्यांच्या भुवया उंचावल्या आहेत. आमच्या जिल्ह्यात सक्षम नेते नाहीत का? असा संतप्त सवाल उपस्थित होत आहे.
प्रकरण फक्त नियुक्तीचे नाही, तर पक्षातील दादागिरी आणि कौटुंबिक वर्चस्वाची गोष्ट आहे, जी आता उघड होतेय. ब्रिटिश काळापासून नागपूरच्या सुनियोजित विकासासाठी स्थापन झालेला नागपूर सुधार प्रन्यास आजही शहराच्या प्रगतीचा आधारस्तंभ आहे. या विश्वस्त मंडळावर लोकप्रतिनिधी आणि अधिकाऱ्यांची नियुक्ती होते. महायुतीच्या सत्तेत राष्ट्रवादीला एक पद मिळाले. पण गेल्या अडीच वर्षांत ते रिक्तच राहिले. आता पुन्हा सत्ता आली, तरीही पक्षाला स्थानिक कार्यकर्ते सापडले नाहीत? की हे सर्व काही विशेष योजनेचा भाग आहे? सुलभा खोडके यांचे नाव विधिमंडळ सचिवाकडे पाठवले गेले. नागपूरमध्ये या असंतोषाची आग भडकली.
सर्व पदे एका घरात?
स्थानिक नेते म्हणतात, हे पद नागपूरच्या विकासासाठी आहे, अमरावतीच्या आमदारांना येथे किती वेळ द्यायचा? त्यांचा नागपूरशी काय संबंध? हे प्रश्न राजकीय वर्तुळात फिरत आहेत. विश्वस्त मंडळात सध्या भाजपचे कृष्णा खोपडे आणि शिवसेनेचे सतीश इटकेलवार आहेत. राष्ट्रवादीने मात्र अमरावतीकडे वळून निर्णय घेतला. यामुळे पक्षातील पदाधिकाऱ्यांमध्ये मोठी अस्वस्थता आहे. भाजपच्या दबावाखाली आमचे नेते दबले का? की पक्षात कोणाची दादागिरी चालली आहे? हा सवाल कार्यकर्ते विचारत आहे. सुलभा आमदार, त्यांचे पती संजय खोडके विधान परिषदेवर आणि आता संघटन सचिवपद.
सर्व पदे एकाच घरात का? असा टोमणा मारत कार्यकर्ते प्रश्न उपस्थित करतात. नागपूर सुधार प्रन्यास हे नागपूरच्या हृदयातील संस्था आहे. येथे पाणी, रस्ते, विकासाचे निर्णय घेतले जातात. अमरावतीची आमदार येथे किती न्याय देतील? स्थानिकांना वाटते, हे निर्णय पक्षाच्या कौटुंबिक बॉन्डिंगचे प्रदर्शन आहे, ज्यामुळे आधारस्तंभ कमकुवत होईल. नागपूरचे पदाधिकारी आता पक्षश्रेष्ठींकडे तक्रारीचा पाऊस पाडणार आहेत. सुलभा खोडके यांची नियुक्ती झाली तर नागपूरच्या विकासाला नवे वळण मिळेल की परक्या हातात कमान गेल्याने गोंधळ वाढेल? कार्यकर्ते म्हणतात, आम्हाला विश्वासघात वाटतोय. अमरावती ते नागपूर हा प्रवास सुलभ असेल का? की स्थानिक रोषाची आग विझवावी लागेल? पुढील काही दिवस हे प्रकरण आणखी तापणार आहे.
Devendra Fadnavis : जप्त शस्त्रांच्या मागची पुरवठा साखळी उलगडणार
