नागपूरमध्ये सुरू असलेले शेतकरी आंदोलन कायम आहे. या संदर्भात बच्चू कडू यांनी सरकारला इशारा दिला आहे.
सरकारशी चर्चा झाल्यानंतर बच्चू कडू यांनी शेतकऱ्यांची रेल रोको आंदोलन रद्द केले आहे. शेतकऱ्यांचे कर्ज माफ करण्याची ग्वाही मुख्यमंत्र्यांनी दिली आहे. जोपर्यंत सरकार कर्ज माफ करत नाही तोपर्यंत आंदोलन सुरू राहील. सरकारने दगाफटका केला तर, गाठ आमच्याशी आहे. माजी मंत्री बच्चू कडू यांनी सरकारला हा इशारा दिला. मुख्यमंत्री आणि दोन्ही उपमुख्यमंत्री यांच्यासोबत झालेल्या बैठकीनंतर बच्चू कडू नागपुरात परतले. त्यानंतर त्यांनी प्रसार माध्यमांशी संवाद साधला.
आम्ही कोणाच्याही विरोधात नाही. सामान्य नागरिकांना त्रास होईल अशी कोणतीही कृती आम्हाला करायचे नाही. परंतु शेतकऱ्यांचे कर्ज माफ झाले पाहिजे अशी आमची भावना आहे. राज्यभरातील शेतकरी आणि शेतकरी नेते आता एकवटले आहेत. जोपर्यंत शेतकऱ्यांचा सातबारा कोरा होत नाही तोपर्यंत आंदोलन सुरू राहील. सरकारने दिलेला शब्द पाळावा. शब्द फिरवला तर आंदोलन आणखी तीव्र करण्यात येईल, असे बच्चू कडू म्हणाले.
आंदोलन स्थगित
नागपूर शहराच्या जवळ असलेल्या जामठा येते शेतकऱ्यांच्या आंदोलन सुरू आहे. या संदर्भात मुंबई उच्च न्यायालयाच्या नागपूर खंडपीठाने जनहित याचिका दाखल करून घेतली आहे. रस्ता आणि रेल्वे वाहतूक विस्कळीत होणार नाही याची काळजी घेण्याचा आदेश अधिकाऱ्यांना देण्यात आला आहे. न्यायालयाच्या आदेशानुसार अधिकाऱ्यांनी सर्व मार्ग वाहतुकीसाठी मोकळे केले आहेत. मात्र आंदोलन सुरू असेपर्यंत अनेक रुग्णवाहिका वाहतूक पंडीमध्ये अडकून पडल्या होत्या. सामान्य नागरिकांनाही या आंदोलनामुळे प्रचंड मनस्ताप सहन करावा लागला.
न्यायालयाचे आदेश मिळाल्यानंतर बच्चू कडू आणि अन्य शेतकरी नेत्यांनी न्यायालयाचा सन्मान करीत असल्याची प्रतिक्रिया व्यक्त केली. मात्र त्यानंतरही रस्तारोको आंदोलन कायम होते. बच्चू कडू चर्चेसाठी मुंबईला निघण्यापूर्वी आंदोलन स्थगित करण्यात आले. चर्चेनंतर सरकार शेतकऱ्यांपुढे झुकले असे बच्चू कडू यांनी जाहीर केले. कर्जमाफीचा लाभ गरीब शेतकऱ्यांना मिळाला पाहिजे अशी सर्वसामान्यांची भावना आहे. काहींनी कृषी कर्ज काढत घराचे बांधकामही केले आहे. काहींनी कृषी कर्जाची रक्कम अन्य कामासाठी वापरली आहे. अशा व्यक्तींना कर्जमाफीचा लाभ मिळू नये, अशी भावना व्यक्त होत आहे.
सरकार शेतकऱ्यांचे कर्ज माफ करण्यासाठी वचनबद्ध आहे. परंतु कर्जमाफीची प्रक्रिया पूर्ण करण्यासाठी वेळ देणे गरजेचे आहे. तोपर्यंत शेतकरी आणि शेतकरी नेते सहकार्य करतील, अशी भावना यापूर्वीच महसूल मंत्री चंद्रशेखर बावनकुळे यांनी व्यक्त केली आहे. सरकारने कर्जमाफीची प्रक्रिया पूर्ण करण्यासाठी आंदोलकांना वेळ मागून घेतला आहे. दिलेल्या मुदतीमध्ये कर्जमाफीची प्रक्रिया पूर्ण झाली पाहिजे, अशी प्रतिक्रिया बच्चू कडू यांनी व्यक्त केली.
