भंडाऱ्यात एकापाठोपाठ भ्रष्टाचार उघडकीस येत आहे. दोन नगर परिषद मुख्याधिकाऱ्यांची चौकशी सुरू आहे. अशात एक तक्रार मुख्यमंत्र्यांकडे दाखल झाली आहे.
एकापाठोपाठ भ्रष्टाचार उघडकीस येत असल्यानं सध्या भंडारा जिल्हा चांगलाच चर्चेत आला आहे. भंडारा नगर परिषदेच्या मुख्याधिकाऱ्यांची बदली करण्यात आली आहे. पवनी नगर परिषदेचे मुख्याधिकारी चौकशीच्या फेऱ्यात अडकले आहेत. अशातच शिवसेना उद्धव बाळासाहेब ठाकरे पक्षाचे जिल्हा प्रमुख संजय रेहपाडे यांनी मुख्यमंत्र्यांकडे तक्रार दाखल केली आहे. देवेंद्र फडणवीस यांना त्यांनी याबाबत पत्र पाठविले आहे. यात एकाच कामाचे दोनदा दाम घेण्यात आल्याचा आरोप आहे.
जलपर्यटनाच्या नावाखाली सरकारी निधीचा दुरुपयोग करण्यात आल्याचा रेहपाडे यांचा आरोप आहे. त्यामुळे पर्यटनाच्या नावाखाली सरकारी पैशांचे पाणी कुठे मुरले, असा प्रश्न उपस्थित होत आहे. जलपर्यटनाचे काम करताना जलसंपदा विभागाची परवानगी घेण्यात आली नाही, असा आरोपही रेहपाडे यांनी केला आहे. विशेष म्हणजे या तक्रारीमुळे पुन्हा एकदा भंडारा नगर परिषद आणि तत्कालीन मुख्याधिकारी करण चव्हाण चर्चेत आले आहेत. त्यामुळे करण चव्हाण यांच्याकडून ही कामं करवून घेणारा कोण, याचा शोध घेण्याची गरज भासत आहे.
Bhandara Municipal Council : अखेर करण चव्हाण यांची भंडारातून बदली
श्रेयनचे आले नाव
रेहपाडे यांनी केलेल्या तक्रारीत श्रेयन इन्फ्रास्ट्रक्चर कंपनीचा स्पष्टपणे उल्लेख करण्यात आला आहे. भंडारा नगर परिषदेच्या कार्यक्षेत्रात पर्यटनाची जागा नाही. मात्र त्यानंतरही दलित वस्ती व नागरी सुविधेचा निधी तिकडे खर्च करण्यात आला. त्यातून सौंदर्यीकरणाच्या नावाखाली 38 कोटी रुपयांची कामं हाती घेण्यात आली. या कामापैकी आर्या कन्स्ट्रक्शन कंपनीला 11.50 कोटी रुपये देण्यात आल्याचा आरोपही रेहपाडे यांनी स्पष्टपणे केला आहे. याच कामांना दुसऱ्या योजनेतील निधीत बसविण्यात आले.
दुसऱ्या योजनेत हे काम बसविल्यानंतर श्रेयन इन्फ्रास्ट्रक्चर कंपनीला 27 कोटी रुपयांचे बिल देण्यात आल्याचा आरोप रेहपाडे यांनी केला आहे. या रकमेपैकी एक रुपयाचे कामही श्रेयन इन्फ्रास्ट्रक्चर कंपनीने केलेले नाही, असे पत्रात नमूद आहे. कामाचे स्वरूप एकच असताना त्याचे सात ते आठ तुकड्यात रुपांतरीत करून निविदा काढण्यात आली. दोन टप्प्यांत हे काम करण्यात आले. दलित वस्ती व नागरी सेवा सुविधेच्या कामांसाठी समाज कल्याण अधिकाऱ्यांची मंजुरी गरजेची असते. मात्र ही मंजुरी घेण्यात आली नाही. 38 कोटींपैकी केवळ दोनच कोटी रुपयांची कामं झाल्याचेही रेहपाडे यांचे म्हणणे आहे.
मास्टरमाइंड वेगळाच
जलपर्यटनाच्या नावाखाली झालेल्या कामांमध्ये भ्रष्टाचाराचा मास्टरमाइंड वेगळाच आहे. पर्यटनाच्या नावाखाली त्याने आपले धनपर्यटन करून घेतल्याचं रेहपाडे यांचं म्हणणं आहे. भंडारा नगर परिषदेचे मुख्याधिकारी यात सहभागी आहेत. याशिवाय जिल्हाधिकारी कार्यालयाचाही यात सहभाग आहे. नियोजन अधिकारी व समाज कल्याण अधिकारी देखील दोषी आहेत. कनिष्ठ अभियंताही या कटात सहभागी असल्याचा आरोप संजय रेहपाडे यांनी केला आहे. याप्रकरणी मुख्यमंत्र्यांकडे त्यांनी तक्रार केली आहे. कायदेशीर सल्लाही रेहपाडे घेत आहेत. सरकारने कारवाई न केल्यास न्यायालयात दाद मागण्याची तयारी सुरू असल्याचेही शिवसेना उद्धव ठाकरे गटातून सांगण्यात येत आहे.
