अकोल्यातील दंगलीनंतर आमदार झालेल्या साजिद खान पठाण यांच्यासमोर ईद-ए- मिलाद आणि गणेशोत्सव एकत्र येत असल्याने सामाजिक सलोखा टिकवण्याचे मोठे आव्हान उभे राहिले आहे.
अकोला जिल्ह्यात अलीकडच्या काळात सामाजिक तणाव आणि दंगलींचा पॅटर्न तयार झाल्याचे दिसत आहे. विशेषत: अकोला शहरात घडलेल्या एका दंगलीत एका व्यक्तीचा मृत्यू झाला. ज्यामुळे राजकीय आणि सामाजिक वातावरण अधिकच तापले. या घटनेनंतर झालेल्या निवडणुकीत काँग्रेस पक्षाला बहुमत मिळाले आणि साजिद खान पठाण हे काँग्रेसचे आमदार म्हणून निवडून आले. साजिद खान पठाण हे मुस्लिम समाजाचे असल्याने त्यांच्या निवडीला मोठ्या प्रमाणात विरोधही झाला. दंगलीच्या घटनेत त्यांच्यावर आरोपही झाले. परंतु न्यायालयाने त्यांना जामीन मंजूर केला.
तरीही, आजही काही लोक आमदार साजिद खान पठाण यांच्यावर दंगलीचा आरोपी म्हणून टीका करतात. या पार्श्वभूमीवर, आमदार साजिद खान पठाण हे स्वतःला जातीवादी नसल्याचे सिद्ध करण्यासाठी सातत्याने प्रयत्न करत आहेत. अलीकडेच, अकोला शहरात श्रावण महिन्याच्या समाप्तीनंतर कावड महोत्सव उत्साहात साजरा झाला. या महोत्सवात आमदार साजिद खान पठाण यांनी शिवभक्तांचे स्वागत करून आपली सर्वसमावेशक भूमिका दाखवण्याचा प्रयत्न केला. याशिवाय, कावड यात्रेदरम्यान काही कावडधारी शिवभक्तांचा अपघात झाला. साजिद खान पठाण यांनी त्या भक्तांची भेट घेऊन त्यांच्याशी संवाद साधला आणि त्यांना आधार दिला.
Maharashtra : कर्जमाफी विसरले सरकार, पण कबुतरांना दिला ‘राजा का मान’?
शक्तिप्रदर्शनाचा नवा ताण
आमदार पठाण यांच्या कृतीमुळे त्यांनी आपली सकारात्मक प्रतिमा निर्माण करण्याचा प्रयत्न केला. आता, लवकरच अकोला शहरात ईद-ए-मिलाद हा सण गणेशोत्सवासोबत एकत्रितपणे साजरा होणार आहे. मात्र, गेल्या काही वर्षांपासून ईद-ए-मिलादच्या मिरवणुकीदरम्यान काही वादग्रस्त घटना घडल्या आहेत. यामध्ये भारतावर आक्रमण करणाऱ्या राज्यकर्त्यांचे पोस्टर लावणे, तसेच काही वेळा जातीय अत्याचार करणाऱ्या व्यक्तींचे फोटो प्रदर्शित करणे आणि अगदी फिलीस्तीनचा ध्वज फडकवण्यासारख्या घटनांचा समावेश आहे. या सर्व पार्श्वभूमीवर, साजिद खान पठाण यांच्यासमोर आता मोठे आव्हान आहे. त्यांना समाजातील अति उत्साही व्यक्तींना आवर घालून सामाजिक सलोखा राखण्याचे आवाहन पेलावे लागणार आहे.
मुस्लिम समाजात साजिद खान पठाण यांच्या आमदारपदामुळे आनंदाचे वातावरण आहे. परंतु आगामी महानगरपालिका निवडणुकीच्या पार्श्वभूमीवर त्यांचे समर्थक ईद-ए-मिलादच्या मिरवणुकीत शक्तीप्रदर्शन करू शकतात. अशा परिस्थितीत, आमदार साजिद खान पठाण यांना शक्तीप्रदर्शन आणि धार्मिक अतिरेक यांचा समतोल राखावा लागेल. जर मिरवणुकीदरम्यान कोणताही धार्मिक अतिरेक किंवा वादग्रस्त प्रदर्शन झाले, तर विरोधक साजिद खान पठाण यांच्यावर टीकेची झोड उठवतील आणि त्यांच्यावर दंगलीच्या घटनेचे खापर फोडण्याची शक्यता आहे. त्यामुळे, अकोल्यातील सामाजिक आणि राजकीय स्थैर्य राखण्यासाठी साजिद खान पठाण यांना अत्यंत सावधगिरीने पावले टाकावी लागतील, अशी ठाम प्रतिक्रिया स्थानिक जनतेतून व्यक्त होत आहे.
Parinay Fuke : शेतकऱ्यांच्या व्यथेसाठी बैलपोळ्याच्या दिवशी उभा आशेचा दीप
