अकोला शहरात शिवसेना शिंदे गटाने विकासकामे बाजूला ठेवून मोकाट कुत्र्यांच्या वाढत्या उपद्रवावर लक्ष केंद्रित केले आहे.
महाराष्ट्राच्या राजकारणात सध्या गोंधळाची लाट उसळली आहे. स्थानिक स्वराज्य संस्थांच्या निवडणुकीच्या पार्श्वभूमीवर प्रत्येक पक्ष रणनीती आखण्यात व्यस्त आहे. पण अकोला शहरात एकनाथ शिंदे यांच्या शिवसेनेने सगळ्यांना चक्रावून टाकलंय. एकीकडे महायुतीतील मित्रपक्ष असलेली भाजपा आणि अजित पवारांची राष्ट्रवादी पक्षबांधणीत गुंतली आहे. तर दुसरीकडे शिंदे गटाची शिवसेना मोकाट कुत्र्यांच्या मागे धावताना दिसतेय. होय, ऐकूनच आश्चर्य वाटतंय ना? पण अकोल्यात शिवसेनेच्या चार-चार जिल्हाप्रमुखांनी शहरातील गंभीर प्रश्न सोडून मोकाट कुत्र्यांवरच लक्ष केंद्रित केलंय. काही दिवसांपूर्वी कुत्र्यांचा मुद्दा चांगलाच गाजत असल्याचे दिसून येत होते. भटक्या कुत्र्यांचा मुद्दा गल्लीबोळांपासून थेट सुप्रीम कोर्टापर्यंत गेल्याचे मागील दिवसांत दिसून आले. त्यानंतर पाळीव व भटक्या कुत्र्यांबाबत अनेक सूचना जारी करण्यात आल्या.
सुप्रीम कोर्टाच्या या निर्णयाला एकनाथ शिंदे यांच्या शिवसेनेने अत्यंत सिरीयस घेतल्याचे दिसून येत आहे. अकोला शहरामध्ये शिवसेना एकनाथ शिंदे गट हा चार जिल्हाप्रमुख असलेला जम्बोपक्ष आहे. अगदी आता वॉर्ड वॉर्ड मध्ये जिल्हाध्यक्ष पद शिवसेना कडून नेमणे बाकी राहिले आहे. अशा परिस्थितीमध्ये शहरातली जे महत्त्वाचे प्रश्न आहेत जसे की, शहराची स्वच्छता असेल मोर्णा नदीतील सफाई असो, वाहतुकीचा प्रश्न, अतिक्रमण असेल, शहरातील कचरा उचलणे किंवा पाणीपुरवठ्याचा प्रश्न असेल, असे सर्व विषय सोडून शिवसेना कुत्र्यांच्या मागे लागली आहे. अकोल्यातल्या जणूकाही सर्व समस्या संपल्या आणि भाजपच्या मदतीने त्यांनी अकोला शहराचा कायापालट करून टाकला आहे. मोकाट कुत्र्यांपासून नागरिकांना धोका आहे. मोकाट कुत्रे जर चावले तर जीवघेणीचा आजार होतो ही, वस्तुस्थिती आहे. त्यामुळे शिवसेनेने जे पाऊल उचलले ते कौतुकास्पद आहे.
Akola BJP : तीन दशक एकनिष्ठ कार्यकर्त्याच्या मदतीला साजिद खान
उद्धव गटाची आक्रमकता
भारतीय जनता पार्टी जी सत्तेमध्ये आहे, ती शिवसेनेला साधा एक रुपयाही फेकून मारत नाही असे अनेकांच्या तोंडू म्हटल्या जाते. विकासाचा कामांमध्ये शिवसेनेच्या कोणत्याही पदाधिकाऱ्यांना भारतीय जनता पार्टी विश्वासात घेत नाही. याशिवाय शिवसेनेमध्ये अंतर्गत गटबाजी भरपूर आहे. माजी आमदार गोपीकिशन बाजोरिया हे स्थानिक नेत्यांना विश्वासात न घेता परस्पर आपले काम करतात. तर दुसरा गट वेगळ्याच तालावर नाचतोय. उद्धव ठाकरे यांची शिवसेना अकोल्यामध्ये सध्या सर्वात जास्त आक्रमक आहे. खरंतरं शिंदेंची शिवसेना ही, आक्रमक आंदोलन, नागरिकांच्या हितासाठी आक्रमक भूमिका घेण्यासाठी प्रसिद्ध आहे. पण उद्धव ठाकरे यांच्या शिवसेनेमध्ये आक्रमकतेचे जी धार आहे, ती एकनाथ शिंदे यांच्या शिवसेनेतील धनुष्यबाणावरती दिसत नाही, ही वस्तुस्थिती नाकारून चालणार नाही.
अकोला शहरात मोकाट कुत्र्यांचा उपद्रव खरंच गंभीर आहे. राणी सतीधाम, खोलेश्वर, जठारपेठ चौक, उमरी, मुख्य बाजारपेठ, रेल्वे स्टेशन परिसर, अकोट फैल, हरिहर पेठ, डाबकी रोड अशा ठिकाणी कुत्र्यांचा सुळसुळाट नागरिकांना त्रासदायक ठरतोय. लहान मुलं, महिला आणि ज्येष्ठांना कुत्र्यांच्या हल्ल्याची भीती सतावतेय. पण हा प्रश्न इतका नवा नाही की शिवसेनेला आता जाग यावी. शहर प्रमुख रमेश गायकवाड यांनी सर्वोच्च न्यायालयाच्या आदेशाचा हवाला देत कुत्र्यांना शेल्टर होम्समध्ये हलवण्याची मागणी केली आहे. शिवसेनेची ही ‘कुत्री धमाल’ पाहता, शहरातील इतर गंभीर प्रश्नांकडे कुणी लक्ष देत आहे की नाही, असा प्रश्न नागरिकांना पडलाय. एकीकडे भाजपा शिवसेनेला विकासकामांत डावलतेय, दुसरीकडे पक्षांतर्गत गटबाजीने शिंदे गटाची रेबीजसारखी अवस्था झाली आहे.
अशा परिस्थितीत पक्षाची एकजूट कशी राहणार? महापालिकेत प्रशासनाचे राज चालतंय, पण चुकीच्या अधिकाऱ्यांना धारेवर धरण्याचे धाडस शिवसेने केले पाहिजे. आधीच विधानसभा निवडणुकीत शिवसेना एकनाथ शिंदे गट फक्त 57 जागांवरच विजय मिळवू शकली होती. यामुळे पक्षामध्ये समाधानापेक्षा नाराजीचे सूर जास्त दिसून आले. आता राज्यभरात स्थानिक स्वराज्य संस्थांची निवडणूक डोळ्यांसमोर आहेत. अशा वेळी जनतेच्या खऱ्या प्रश्नांकडे लक्ष न देता, कुत्र्यांच्या मागे लागण्यात जर शिवसेना रमली, तर विधानसभा प्रमाणेच स्थानिक निवडणुकीतही मोजक्या जागांमध्येच समाधान मानावे लागेल, असा सवाल राजकीय वर्तुळात जोर धरू लागला आहे.
