महाराष्ट्रात स्थानिक स्वराज्य संस्थांच्या निवडणुकीच्या वाऱ्याने गती पकडली आहे. अकोला जिल्ह्यातही या निवडणुकीच्या प्रक्रियेला नवे वेग आणि उत्साह मिळत आहे.
अकोला शहरात राजकीय वातावरण चांगलेच तापले आहे. सहा वर्षांच्या प्रदीर्घ प्रतीक्षेनंतर, सुप्रीम कोर्टाच्या आदेशाने स्थानिक स्वराज्य संस्थेच्या निवडणुकीचा मार्ग मोकळा झाला आहे. या निर्णयाने राजकीय पक्षांनी कंबर कसली असून, निवडणूक आयोगही जोमाने कामाला लागला आहे. अकोल्याच्या राजकीय रणभूमीवर आता प्रभाग रचनेचा नवा नकाशा समोर आला आहे. येत्या काही महिन्यांतच मतदानाची प्रक्रिया पार पडणार असल्याची चिन्हे स्पष्ट दिसत आहेत. शहरात उत्सुकतेचे वारे वाहू लागले आहे, कारण प्रत्येक पक्ष आपली रणनीती आखण्यात व्यस्त आहे. नव्या प्रभाग रचनेने अकोल्याच्या राजकीय गोटात खळबळ उडाली आहे. या रचनेनुसार, शहराला 20 प्रभागांत विभागले गेले आहे.
प्रत्येक प्रभागातून चार नगरसेवक निवडले जाणार आहेत. यामुळे एकूण 80 नगरसेवकांचा भक्कम लोकप्रतिनिधींचा गट तयार होईल. 2011 वर्षाच्या जनगणनेनुसार, अकोला शहराची लोकसंख्या 5 लाख 36 हजार 726 आहे. ज्यामध्ये अनुसूचित जातींची लोकसंख्या 90 हजार 961 आणि अनुसूचित जमातींची 11 हजार 574 आहे. प्रभाग क्रमांक 9 मध्ये सर्वाधिक 29 हजार 329 लोकसंख्या नोंदवली गेली आहे. तर प्रभाग क्रमांक 12 मध्ये सर्वात कमी 24 हजार 239 लोक राहतात. अनुसूचित जातींसाठी प्रभाग क्रमांक 2 मध्ये 10 हजार 431 लोकसंख्या आहे. तर अनुसूचित जमातींसाठी प्रभाग क्रमांक 17 मध्ये 1 हजार 29 लोक आहेत. ही आकडेवारी शहराच्या सामाजिक आणि राजकीय समीकरणांना नवा आकार देणारी ठरणार आहे.
Maharashtra : नितीन गडकरींच्या ‘समृद्धी’ने अपघातांना लावले अंकुश
मतदारांचा कौल कुणाकडे?
नव्या प्रभाग रचनेचा प्रारूप आराखडा जाहीर झाला असून, याबाबत नागरिकांना 3 सप्टेंबर ते 15 सप्टेंबर या कालावधीत हरकती आणि सूचना नोंदवण्याची संधी आहे. महानगरपालिकेचे जनसंपर्क प्रमुख भरत शर्मा यांनी सायंकाळी 6 वाजता ही माहिती जाहीर केली. सर्व 20 प्रभागांचा एकत्रित नकाशा लवकरच प्रकाशित होणार आहे. ज्यामुळे नागरिकांना आपल्या भागाची रचना समजण्यास मदत होईल. अंतिम प्रभाग रचना राज्य निवडणूक आयोगाच्या मान्यतेनंतरच निश्चित होईल, असे शर्मा यांनी स्पष्ट केले. या प्रक्रियेमुळे अकोल्यातील नागरिकांना आपल्या मताचा आवाज निवडणुकीपूर्वीच उठवण्याची संधी मिळाली आहे. अकोल्याचे राजकीय चित्र पाहता, येथील राजकारण नेहमीच चुरशीचे राहिले आहे. मात्र, सध्या कोणताही पक्ष एकजुटीने काम करताना दिसत नाही.
शिवसेना एकनाथ शिंदे गटामध्ये सध्या अंतर्गत कलह बघायला मिळत आहे. कार्यकर्ते दोन गटांत विभाजले असल्याचे चित्र आहेत. याचा परिणाम निवडणुकीवर होण्याची शक्यता आहे. उद्धव ठाकरे गटाने मात्र अकोल्यात आपले वर्चस्व कायम ठेवले आहे. दुसरीकडे, भारतीय जनता पक्षाला (भाजप) अकोला पश्चिम हा आपला बालेकिल्ला गमावल्यानंतर आता नव्याने उभारी घ्यावी लागणार आहे. विधानसभा निवडणुकीत काँग्रेसने बाजी मारली. आता महापालिका निवडणुकीतही त्यांचा जोर दिसून येत आहे. राष्ट्रवादी काँग्रेसचे अकोल्यात फारसे अस्तित्व नाही, त्यामुळे येथील लढत प्रामुख्याने काँग्रेस, भाजप आणि शिवसेनेच्या गटांमध्ये रंगण्याची शक्यता आहे. या निवडणुकीच्या रणधुमाळीत प्रत्येक पक्ष आपली ताकद पणाला लावत आहे. प्रभाग रचनेमुळे अकोल्यातील राजकीय समीकरणे बदलणार असून, मतदार कोणाला कौल देणार, हे पाहणे उत्सुकतेचे ठरणार आहे.
