पंतप्रधान नरेंद्र मोदी यांच्या पंचाहत्तराव्या वाढदिवसानिमित्त भाजप विविध ठिकाणी उपक्रम राबवत आहे.
17 सप्टेंबर 2025 हा दिवस भारतीय जनता पक्षासाठी एक अविस्मरणीय उत्सव ठरला. पंतप्रधान नरेंद्र मोदी यांचा वाढदिवस केवळ केक कापण्यापुरता मर्यादित राहिला नाही, तर तो देशाच्या आरोग्य क्षेत्रात एका नव्या क्रांतीचा प्रारंभ झाला. भारतीय जनता पक्षाने या निमित्ताने विविध उपक्रम आणि मोहिमा राबवल्या, ज्यातून लाखो लोकांना प्रेरणा मिळाली. अश्यातच केंद्रीय दळणवळण मंत्री नितीन गडकरी यांनी एक महत्वाची माहिती सांगितली आहे. मोदींच्या नेतृत्वाखालील सरकारने या दिवशी निरोगी महिला सक्षम कुटुंब आणि आठवा राष्ट्रीय पोषण महिना या दोन महत्त्वाकांक्षी मोहिमांचा शुभारंभ केला. मध्य प्रदेशातील धार येथे हा कार्यक्रम पार पडला, तर पंतप्रधान नोएडातील राष्ट्रीय जैविक संस्थेतून व्हर्च्युअल पद्धतीने सहभागी झाले. त्यांनी उपस्थितांना संबोधित करताना, देशाच्या आरोग्य आणि पोषणासाठीची आपली वचनबद्धता पुन्हा एकदा अधोरेखित केली. मोहिमा म्हणजे केवळ घोषणा नव्हे, तर एक संपूर्ण आरोग्य क्रांती ठरली, असे गडकरी म्हणाले.
17 सप्टेंबर ते 2 ऑक्टोबर 2025 या कालावधीत देशभरात एक लाखाहून अधिक आरोग्य शिबिरे आयोजित केली जाणार आहेत. ही शिबिरे आयुष्मान आरोग्य मंदिरे, सामुदायिक आरोग्य केंद्रे, जिल्हा रुग्णालये आणि इतर सरकारी सुविधांमध्ये चालवली जातील. यातून महिला आणि मुलांच्या आरोग्याला प्राधान्य देण्यात येईल. या मोहिमा रक्तक्षय, क्षयरोग आणि सिकलसेल रोग यांसारख्या आजारांच्या तपासणीसाठी विशेष भर देतील, ज्यातून लवकर निदान आणि उपचार शक्य होईल.नितीन गडकरी यांनी पुढे सांगितले की, या क्रांतिकारी मोहिमांचा केंद्रबिंदू आहे महिला-केंद्रित आरोग्य सेवा. प्रसूतीपूर्व काळजी, लसीकरण, पोषण, मासिक पाळी स्वच्छता, जीवनशैली आणि मानसिक आरोग्य यावर विशेष जागरूकता उपक्रम राबवले जातील.
Bacchu Kadu : गेट तोडून जिल्हाधिकारी कार्यालयात शेतकऱ्यांचा तुफान हल्ला
निरोगी जीवनशैलीचा संदेश
वैद्यकीय महाविद्यालये, जिल्हा रुग्णालये, केंद्र सरकारी संस्था आणि खाजगी रुग्णालये यांच्या सहकार्याने स्त्रीरोग, बालरोग, नेत्ररोग, ईएनटी, दंतचिकित्सा, त्वचारोग आणि मानसोपचार यासारख्या विशेष सेवा उपलब्ध करून दिल्या जातील. हे सर्व केवळ उपचार नाही, तर एक संपूर्ण जीवनशैली बदलण्याची प्रक्रिया आहे. याशिवाय, देशव्यापी रक्तदान मोहीम हा या उत्सवाचा आणखी एक चमकदार पैलू आहे, असं गडकरी म्हणाले. ई-रक्तकोश पोर्टलवर दात्यांची नोंदणी करून, लाखो लोकांना रक्तदानासाठी प्रोत्साहित केले जाईल. पीएम-जेएवाय, आयुष्मान वय वंदना आणि आभा योजनेअंतर्गत लाभार्थ्यांची नोंदणी केली जाईल. आरोग्य शिबिरांमध्ये हेल्पडेस्क स्थापित करून, कार्ड पडताळणी आणि तक्रार निवारणाची सोय करण्यात येईल. हे सर्व उपक्रम समुदायांना निरोगी जीवनशैलीकडे वळवतील. ज्यात लठ्ठपणा प्रतिबंध, सुधारित पोषण आणि स्वैच्छिक रक्तदानावर विशेष भर असेल.
कार्यक्रमात पंतप्रधानांनी एका क्लिकवर प्रधानमंत्री मातृ वंदना योजनेअंतर्गत देशभरातील सुमारे दहा लाख महिलांच्या बँक खात्यांमध्ये थेट निधी हस्तांतरित केला. लाखो मातांना या निधीचा फायदा होऊन, त्यांच्या कुटुंबातील आर्थिक स्थैर्य वाढेल. यासोबतच, माता आणि बाल आरोग्याविषयी जागरूकता निर्माण करण्यासाठी ‘सुमन सखी’ चॅटबॉट सुरू करण्यात आले. हा चॅटबॉट ग्रामीण आणि दुर्गम भागातील गर्भवती महिलांना वेळेवर आणि अचूक माहिती देईल. ज्यामुळे त्यांना आवश्यक आरोग्य सेवा सहज उपलब्ध होतील. एखाद्या स्मार्टफोनवरून मिळणारी ही माहिती, कित्येक जीव वाचवू शकते. पंतप्रधान मोदींच्या वाढदिवसाने सुरू झालेल्या या मोहिमा केवळ सरकारी योजना नाहीत, तर एक राष्ट्रीय अभियान आहे जे प्रत्येक भारतीयाला निरोगी आणि सक्षम बनवेल. भाजपने राबवलेल्या या उपक्रमांमुळे, देशभरात उत्साहाचे वातावरण आहे.
