स्थानिक निवडणुकीच्या पार्श्वभूमीवर, राष्ट्रवादी काँग्रेस शरदचंद्र पवार गटाला विदर्भातील राजकारणात मोठा धक्का बसला आहे.
महाराष्ट्रात स्थानिक स्वराज्य संस्थांच्या निवडणुकीची रणधुमाळी जोरात सुरू असताना, विदर्भाच्या राजकीय आखाड्यात एका मोठ्या घडामोडीने सर्वांचे लक्ष वेधले आहे. राष्ट्रवादी काँग्रेस शरदचंद्र पवार गटाला मोठा धक्का बसला आहे. नागपूरमधील एका कंत्राटदाराच्या आत्महत्या प्रकरणाने राजकीय वर्तुळात खळबळ माजवली आहे. या प्रकरणात पोलिसांनी कडक कारवाई करत शरद पवार यांच्या पक्षातील यवतमाळचे नेते शरद मैंद यांना अटक केली आहे. मैंद यांनी यापूर्वी विधानसभा निवडणूक लढवली होती. आता त्यांच्या अटकेमुळे विदर्भाच्या राजकारणात भूकंपाचे धक्के जाणवत आहेत.
नागपूरच्या राजनगर परिसरात 1 सप्टेंबर रोजी सार्वजनिक बांधकाम विभागाचे कंत्राटदार पेनमाचा वेंकटेश्वर (पी.व्ही.) वर्मा ऊर्फ मुन्ना वर्मा (वय 61) यांनी आपल्या फ्लॅटमध्ये गळफास घेऊन आत्महत्या केली. या घटनेने संपूर्ण विदर्भ हादरला. वर्मा यांच्या आत्महत्येमागे त्यांच्या कोट्यवधी रुपयांच्या थकित बिलांचा ताण आणि आर्थिक संकट असल्याचे प्रथमदर्शनी समोर आले. मात्र, पोलिसांनी या प्रकरणाचा सखोल तपास केला असता, त्यामागील काही धक्कादायक सत्य उघड झाले. पोलिसांनी दोन जणांविरुद्ध गुन्हा दाखल करत शरद मैंद आणि मंजित वाडे या दोघांना अटक केली.
Mahavikas Aghadi : साहेबांकडून मोदींना शुभेच्छा, पण गठबंधनात गडबड का?
प्रभावशाली नेत्याला अटक
कारवाईने राष्ट्रवादी काँग्रेस शरदचंद्र पवार गटाच्या निवडणूक रणनीतीला मोठा धक्का बसला आहे. शरद मैंद हे यवतमाळमधील पुसद अर्बन को-ऑपरेटिव्ह बँकेशी संबंधित आहेत. या बँकेतून वर्मा यांनी मोठ्या प्रमाणात कर्ज घेतले होते. मात्र, या कर्जाची परतफेड आणि त्यामागील आर्थिक व्यवहार यावरून वर्मा यांच्यावर प्रचंड दबाव होता. दुसरीकडे, मंजित वाडे हा अवैध सावकारी करत असल्याचे पोलिस तपासात उघड झाले. वाडे याने वर्मा यांना उच्च व्याजदराने कर्ज देऊन त्यांच्यावर वसुलीसाठी तगादा लावला होता. या आर्थिक दबावामुळे वर्मा यांनी टोकाचे पाऊल उचलले, असे पोलिसांचे म्हणणे आहे.
पुसदमधून मैंद यांना अटक झाल्याने स्थानिक राजकारणात मोठी उलथापालथ होण्याची शक्यता आहे. या प्रकरणाने यवतमाळच्या राजकीय वातावरणात तणाव निर्माण झाला आहे. शरद मैंद हे पुसदमधील प्रभावशाली नेते मानले जातात. त्यांच्या अटकेमुळे राष्ट्रवादी काँग्रेस शरदचंद्र पवार गटाची निवडणूक तयारी आणि प्रतिमा यावर परिणाम होण्याची शक्यता आहे. स्थानिक कार्यकर्त्यांमध्येही संभ्रमाचे वातावरण आहे. पोलिसांनी या प्रकरणाचा तपास तीव्र केला आहे. विदर्भातील ही घटना केवळ एका आत्महत्येपुरती मर्यादित नसून, यामागील आर्थिक व्यवहार आणि राजकीय हितसंबंध यामुळे यवतमाळसह संपूर्ण विदर्भातील राजकारण ढवळून निघाले आहे. स्थानिक स्वराज्य संस्थांच्या निवडणुकीच्या पार्श्वभूमीवर ही घटना राष्ट्रवादी काँग्रेस शरदचंद्र पवार गटासाठी मोठा धक्का मानली जात आहे.
Congress : बावनकुळेंच्या मतदारसंघात लुट; मत गेले आता जमीनही गिळली
