राज्यात दिवाळीची धामधूम सुरू असताना फटाके आणि मिठाईचा सुगंध सर्वत्र पसरलेला आहे. अशातच अकोला जिल्ह्यात एक घटना घडली आहे.
महाराष्ट्रात सध्या दिवाळीचा उत्साह सर्वत्र पसरलेला आहे. रंगबिरंगी दिवे, फटाक्यांचा आवाज, मिठाईचा गोडवा सुगंध आणि कुटुंबीयांच्या एकत्र येण्याच्या क्षणांनी राज्यातील वातावरण आनंदमय झाले आहे. मात्र, या सणासुदीच्या काळातही काही ठिकाणी वेगवेगळ्या घटना घडताना दिसत आहे. अकोला जिल्ह्यातील एका ताज्या प्रकरणाने पुन्हा एकदा अशाच तणावाची आठवण करून दिली आहे. गोवंश तस्करीच्या संशयित प्रकरणात पोलिसांनी दाखविलेल्या तत्परतेने संभाव्य तणाव टळला आहे. अकोला जिल्हा नेहमीच अशांततेच्या छायेत राहिला आहे. गेल्या अनेक दशकांत येथे दंगल, जाळपोळ आणि हाणामारी सारख्या घटना घडल्या आहेत. ज्या स्थानिकांच्या स्मरणात अद्याप ताज्या आहेत. 2023 मधील धार्मिक दंगल हे त्यातील एक मोठे उदाहरण आहे.
अकोला जिल्ह्यातील वातावरण आता हळूहळू शांत होत आहे. गोवंश तस्करीच्या अफवांमुळे शुक्रवारी (17 ऑक्टोबरला) बजरंग दलाच्या कार्यकर्त्यांनी आणि कोतवाली पोलिसांनी कारवाई करण्याचा प्रयत्न केला. मात्र, हे प्रकरण स्थानिकांशी वादात रूपांतरित झाले आणि पोलिसांवर दगडफेक झाल्याची अफवा पसरली. या घटनेने परिसरातील वातावरण ढवळून निघाले. अफवा पसरल्याने लोकांच्या मनात असुरक्षिततेची भावना निर्माण झाली. परंतु पोलिसांनी वेळीच धाव घेत तणाव संपवला. या वातावरणात अकोला पश्चिमचे काँग्रेस आमदार साजिद खान पठाण यांनी घटनास्थळी धाव घेतली. त्यांनी स्थानिकांच्या भावना समजून घेताना पोलिस ठाण्यात तक्रार दाखल करण्यासाठी पुढाकार घेतला.
Prakash Ambedkar : शिक्षणाने नाही, भेदभावाने थांबवला तरुणाचा प्रवास
दगडफेकीची अफवा
काही महिला आणि जमावासह पोलीस ठाण्यात पोहोचून त्यांनी न्यायाची मागणी केली. आमदार साजिद खान यांनी शांततेचे आवाहन करताना म्हणाले की, अशा घटनांमुळे समाजातील सद्भावना धोक्यात येते आणि त्यासाठी तातडीने चौकशी आवश्यक आहे. पोलिसांनी त्यांची तक्रार स्वीकारली आणि प्राथमिक तपास सुरू केला. वादाबाबत ‘द लोकहित लाइव्ह’शी बोलताना पोलिस अधीक्षक अर्चित चांडक यांनी अधिकृत माहिती दिली. गोवंश तस्करीबाबत माहिती मिळाल्याने कोतवाली पोलिस काही लोकांसोबत गेले होते. त्याठिकाणी मामुली वाद झाला हे खरे आहे. परंतु मोठा जमाव पोलिसांवर किंवा अन्य समाजाच्या लोकांवर चालून आला नाही. पोलिसांवर किंवा अन्य कुणावरही दगडफेक झालेली नाही. कोतवाली पोलिस स्टेशनसमोर काही लोक तक्रार देण्यासाठी आले. त्यांची तक्रार घेण्याची प्रक्रिया सुरू करण्यात आली.
संपूर्ण अकोला जिल्हा शांत आहे. लोकांनी कोणत्याही अफवांवर विश्वास ठेऊ नये. सोशल मीडियावरून चुकीचे फोटो, व्हिडीओ मुद्दाम व्हायरल केल्या जाण्याची अशा घटनांमध्ये शक्यता असते. नागरिकांनी अशा कोणत्याही पोस्टवर विश्वास ठेऊ नये. कोणत्याही पोस्ट खात्री केल्याशिवाय व्हायरल करु नये. कावड यात्रा, गणेशोत्सव, नवदुर्गा, ईद ए मिलाद, धम्मचक्र प्रवर्तन दिन अशा उत्सवांमध्ये अकोल्यातील नागरिकांनी बंधुभावाचा परिचय दिला. आपल्याला अकोल्यात आल्यापासून जनतेने प्रचंड प्रेम दिले. त्यामुळे अकोला आणि या शहरातील नागरिकांनी आपल्या मनात प्रेम आणि आदराचे स्थान मिळविले आहे. अकोल्यातील सर्व समाजाचे, धर्माचे नागरिक शांतता कायम ठेवून असेच प्रेम देत राहतील ही अपेक्षा आहे. आपल्या शरीरावर जोपर्यंत खाकी वर्दी आहे, तोपर्यंत कुणावरही आपण अन्याय होऊ देणार नाही, असे चांडक यांनी सांगितले.
Maoists Surrender : क्रांतीच्या भ्रमातून संविधानाच्या सत्याकडे
