विदर्भातील पोलिस दलात सर्वकाही सुरळीत सुरू असताना अचानक तीन अधिकाऱ्यांच्या बदलीबाबत चर्चेने जोर धरला आहे.
मुख्यमंत्री तथा गृहमंत्री देवेंद्र फडणवीस यांच्या कार्यकाळात अधिकाऱ्यांच्या बदल्यांमधील भ्रष्टाचार जवळपास संपुष्टात आला आहे. पोलिस दलातील अधिकाऱ्यांची नियुक्ती आणि बदली प्रक्रिया मेरीटच्या आधारावर करण्याचा पूर्ण प्रयत्न स्वत: फडणवीस करीत आहेत. मात्र त्यानंतरही झारीतील काही शुक्राचार्य प्रामाणिक अधिकाऱ्यांच्या खुर्चीवर डोळा ठेऊन असल्याचे दिसत आहे. त्यातूनच विदर्भातील तीन कर्तबगार आयपीएस अधिकाऱ्यांच्या बदलीच्या चर्चेने सध्या विनाकारणच जोर धरला आहे.
यातील दोन अधिकाऱ्यांना स्वत:हून बदली हवी असल्याची माहिती पोलिस महासंचालनालय आणि मंत्रालयापर्यंत पोहोचविण्यात आली आहे. अकोल्याचे पोलिस अधीक्षक अर्चित चांडक आणि नागपूर ग्रामीणचे पोलिस अधीक्षक हर्ष पोद्दार हे ते दोन अधिकारी आहे. गेल्या काही दिवसांपासून चांडक आणि पोद्दार यांना बदली हवी असल्याची अफवा प्रशासकीय पातळीवर सर्वत्र पेरण्यात आली आहे. मात्र यात कोणतेही तथ्य नसल्याचे पुढे आले आहे. नागपूर ग्रामीण भागातील पोलिस दलाला हर्ष पोद्दार यांनी प्रचंड ताकदीने पुढे नेले आहे.
Akola Police : अर्चित चांडक यांच्यामुळे ताज्या झाल्या चार दशक जुन्या स्मृती
कर्तबगारी बोलते!!
पोद्दार यांनी नागपूर ग्रामीणचे एसपी म्हणून पदभार घेतल्यापासून ग्रामीण भागातील गुन्हेगारांवर वचक बसविला आहे. पोद्दार आणि त्यांच्या टीमचे आतापर्यंत केलेल्या कामामुळे ग्रामीण पोलिस दलाची प्रतिमा उंचावली आहे. लंडनमधील आरामाची नोकरी सोडून पोद्दार हे भारतीय पोलिस सेवेत दाखल झालेत. मूळचे पश्चिम बंगाल येथील असलेल्या पोद्दार यांनी कोविड काळात केलेल्या कामाची दखल जागतिकस्तरावर घेतली गेली आहे.
नागपूर ग्रामीणचे पोलिस अधीक्षक म्हणून 31 ऑगस्ट 2023 पासून पोद्दार हे कार्यरत आहे. त्यांचा कार्यकाळ पूर्ण झाल्याकडे जाणीवपूर्वक पोलिस महासंचालक कार्यालय आणि गृह विभागाचे लक्ष वेधण्यात येत आहे. पोद्दार यांना परदेशात डेप्युटेशनवर जायचे आहे. असा अपप्रचार त्यासाठी केला जात आहे. मध्यंतरीच्या काळात पोद्दार यांनी स्वत: बदलीसाठी अर्ज तयार केला होता, अशी अफवाही पसरविण्यात आली. मात्र यातील एकाही गोष्टीत तथ्य नाही. हर्ष पोद्दार हे प्रामाणिक अधिकारी आहेत. त्यांनी बदली, पोस्टिंग मिळविण्यासाठी आजपर्यंत वशिलेबाजी किंवा चुकीच्या मार्गाचा अवलंब केल्याचे ऐकीवात नाही. मात्र तरीही त्यांच्या नावाने अपप्रचार सुरू झाला आहे.
खुर्चीवर डोळा
वास्तविकेत हर्ष पोद्दार यांच्या प्रामाणिकपणा आणि कामामुळे नागपूर ग्रामीण भागातील सगळेच खुख आहेत. राजकीय नेते असो की सामान्य नागरिक सगळेच पोद्दार यांच्या कामामुळे ‘इम्प्रेस’ आहेत. मात्र पोद्दार यांच्या खुर्चीवर डोळा ठेऊन असलेल्या काहींनी हा अपप्रचार चालविला आहे. नागपुरातील एक अधिकारी तर सातत्याने पोद्दार यांचा कार्यकाळ पूर्ण झाला आहे, त्यांना प्रशासकीय कारणाने बदली देणे गरजेचे असल्याचे वारंवार वरिष्ठांना, नेत्यांच्या निदर्शनास आणून देत आहे. असाच प्रकार अकोल्याचे पोलिस अधीक्षक अर्चित चांडक यांच्याबाबत सुरू आहे.
IPS Rashmita Rao : महिला संरक्षणार्थ महाकालीच्या दशभुजा सक्रिय
नागपुरातील बेशिस्त वाहतुकीला खऱ्या अर्थाने शिस्त लावणारे अधिकारी म्हणजे अर्चित चांडक. चांडक यांची नियुक्ती अलीकडेच अकोला येथे पोलिस अधीक्षक म्हणून झाली आहे. चांडक यांनी कमी वेळाच अकोल्यातील जनतेचे मन जिंकले आहे. विशेष म्हणजे तरूणाईमध्ये चांडक यांच्या नावाची क्रेझ आहे. अकोल्याच्या इतिहासात 40 वर्षांनंतर सामान्य नागरिकांनी एखाद्या सार्वजनिक मिरवणुकी एसपीच्या नावाने जयजयकार केला. राकेश मारीया यांच्यानंतर ते अधिकारी अर्चित चांडक ठरले. मात्र त्यांनाही बदली हवी असल्याची अफवा पसरविण्यात आली आहे.
म्हणे अमरावती पाहिजे
अर्चित चांडक यांच्या पत्नी सौम्या शर्मा चांडक या आयएएस अधिकारी आहेत. सध्या त्या अमरावती महापालिकेत आयुक्त म्हणून कार्यरत आहेत. चांडक यांना अमरावती ग्रामीणमध्ये एसपी म्हणून बदली हवी असल्याची माहिती पेरण्यात आली आहे. अमरावती ग्रामीणचे पोलिस अधीक्षक असलेले विशाल आनंद यांच्या जागेवर त्यांना जायचे आहे, अशी माहिती डीजी कार्यालय आणि गृह विभागापर्यंत पोहोचविण्यात आली आहे. मात्र चांडक यांनी असा कोणताही प्रयत्नच केला नाही. उलट चांडक यांना अकोल्यात येऊन अगदी काही महिने झाले आहेत. अकोल्यातील त्यांचा कार्यकाळ उत्तम सुरू आहे.
IPS S Rushikesh Reddy : एआयच्या तीक्ष्ण नजरेने बंदोबस्ताला धार
अर्चित चांडक, हर्ष पोद्दार, विशाल आनंद हे तीनही अधिकारी आजपर्यंत कोणत्याही वादात सापडलेले नाहीत. तीनही अधिकाऱ्यांचे काम अत्यंत चांगल्या पद्धतीने त्यांच्या त्यांच्या जिल्ह्यात सुरू आहे. त्यानंतरही या तीन या अधिकाऱ्यांना हलविण्यासाठी अशी कोणती ‘लॉबी’ सक्रिय झाली आहे, याची प्रश्न आता प्रशासकीय वर्तुळातील अनेकांना पडला आहे. या तीनही अधिकाऱ्यांच्या नावाचा वापर करीत कोणी भलताच तर जिल्हा मिळविण्यासाठी ‘फिल्डिंग’ लावत नाहीये ना? याचा कसून शोध घेण्याची गरज डीजी कार्यालय आणि गृह विभागाला घेण्याची आवश्यकता आहे. असा प्रकार होत असेल तर देवाभाऊंनी या तीनही अधिकाऱ्यांच्या पाठीशी खंबीरपणे उभे राहावे, अशी पोलिस दलातील अनेक आयपीएस अधिकाऱ्यांची इच्छा आहे.
