महापालिकेच्या निवडणुकीबाबत अमरावतीत रस्सीखेच सुरू आहे. भाजप आणि युवा स्वाभिमान यांच्यात युतीवरून ओढाताण कायम आहे.
स्थानिक नेत्यांशी पंगा असतानाही भाजपला आपलेसे वाटणारे आमदार म्हणजे रवी राणा. आगामी महापालिका निवडणुकीत राणा यांनी भाजपसोबत युतीचा प्रस्ताव मांडला आहे. त्यांनी युवा स्वाभिमान पक्षासाठी भक्कम जागा भाजपकडे मागितल्या आहेत. मात्र त्यांच्या या प्रस्तावाला वरिष्ठांनी ‘होल्ड’वर ठेवले आहे. स्थानिक भाजप नेत्यांचा मात्र राणा यांना चांगलाच विरोध आहे. त्यामुळे महापालिका निवडणुकीत भाजप त्यांना खुश करणार की ‘मुझको राणाजी माफ करना’ असे सांगणार याची प्रतीक्षा आहे.
नगर परिषद आणि नगर पंचायत निवडणूक सध्या सुरू आहे. या निवडणुकीसाठीही राणांना अद्याप भाजपने होकार किंवा नकार कळविलेला नाही. भाजपचे प्रवक्ता शिवराय कुळकर्णी यांनी मात्र भाजपच्या कार्यकर्त्यांना संधी मिळालीच पाहिजे अशी स्पष्ट भावना व्यक्त केली आहे. त्यामुळे भाजपच्या स्थानिक पातळीवरून राणा यांना विरोध होणार असे स्पष्ट आहे. लोकसभा निवडणुकीतही राणा दाम्पत्याला अमरावतीत प्रचंड विरोध झाला. महायुती आणि महाविकास आघाडी दोन्हींकडून भाजपच्या उमेदवार नवनीत राणा यांची कोंडी करण्यात आली.
विधानसभेत यश
लोकसभा निवडणुकीत प्रचंड विरोध झाल्याने नवनीत राणा यांना पराभवाचा सामना करावा लागला. असाच विरोध रवी राणा यांना विधानसभा निवडणुकीतही सहन करावा लागला. मात्र त्यांनी यश खेचून आणले. आता नगर परिषद आणि नगर पंचायत निवडणुकीत राणा यांचा युवा स्वाभिमान भाग्य अजमावत आहे. यापेक्षाही त्यांची प्रतिष्ठा अमरावती महापालिकेत पणाला लागणार आहे. राणा यांचे राजकारण अमरावतीपुरते आहे. त्यांच्या पक्षाचा जोरही अमरावती शहरात जास्त आहे. त्यामुळे अमरावती महापालिकेवर आपलेच वर्चस्व राहावे, अशी त्यांची अपेक्षा आहे. त्यांची ही मनोकामना पूर्ण होऊ नये, अशी भाजपची इच्छा आहे.
राणा यांना रोखण्यासाठी भाजपकडून गेल्या निवडणुकीचा लेखाजोखा मांडण्यात आला आहे. मात्र गेल्या निवडणुकीत भाजपला यश मिळाले, तेव्हाचे गणित वेगळे होते. काँग्रेसकडून दुखावलेले डॉ. सुनील देशमुख तेव्हा भाजपमध्ये होते. देशमुखांचे समर्थकही त्यामुळे हाती ‘कमळ’ घेऊन होते. देशमुख यांनी काँग्रेससोबत पुन्हा ‘हात’ मिळविल्यानंतर भाजपमध्ये आलेले व नगरसेवक झालेल्यांनी पुन्हा ‘अबाऊट टर्न’ केला. त्यामुळे भाजपच्या आकडेवारीत यंदा बदल होऊ शकतो, अशी शक्यता आहे.
Ravi Rana : प्रहारच्या कार्यकर्त्याकडून मुंडके छाटण्याची धमकी
चंदूभाऊंवर भीस्त
राजकारणात रवी राणा यांनीही कच्च्या गोट्या खेळलेल्या नाहीत. ‘जुगाड टेक्नॉलॉजी’चा वापर करीत त्यांनी सगळ्यात पहिले नवनीत राणा यांना राष्ट्रवादी काँग्रेसच्या कोट्यातून खासदार केले. विशेष म्हणजे राणा यांचा विवाह झाला, त्यावेळी त्यांनी अमरावतीत सामूहिक विवाह सोहळा घेतला होता. त्यावेळी अजित पवार राज्याचे उपमुख्यमंत्री होते. काँग्रेस आणि राष्ट्रवादी काँग्रेस राज्यात सत्तेत होती. त्यावेळी राणा यांनी राजापेठमधील एका हॉटेलमध्ये पत्रकार परिषद घेतली. अजितदादांचे राजकारण संपविणार असे राणा यांनी त्यावेळी जाहीर करून टाकले.
कालांतराने ‘घड्याळ’ची वेळ बदलली आणि राणांना दादांची गरज पडली. दादांनीही राणांना मन मोठं करीत माफ केलं. त्यानंतर नवनीत राणा खासदार झाल्या. पुन्हा हवेचा रोख पाहत राणा भाजपकडे वळले. त्यांनी फडणवीसांना ‘देव’ केलं. उद्धव ठाकरेंशी पंगा घेतला. सगळ्यांच्या नाकावर टिच्चून पुन्हा नवनीत राणा यांना लोकसभ निवडणुकीत भाजपची उमेदवारी मिळवून दिली. पोलिस सुरक्षाही पदरात पाडली. स्टार प्रचारक म्हणूनही नवनीत भाभी फिरल्या. आता त्याच ‘टेक्नॉलॉजिया’चा वापर राणा करीत आहेत.
स्थानिक पातळीवर कितीही विरोध असला तरी राणा चंदूभय्या अर्थात चंद्रशेखर बावनकुळे यांच्या थेट संपर्कात आहेत. बावनकुळे सध्या निवडणूक प्रमुख आहेत. राणांबद्दल यांचं मत चांगलं आहे. त्यामुळे चंदूभय्यांच्या कृपेने आपली राजकारणातील बावनकुळे (सर्व पिढ्या) उद्धारतील असा राणांना विश्वास आहे. हा विश्वास किती सार्थकी ठरतो हे लवकरच दिसणार आहे.
