भौगोलिक दृष्टीने लहान असलेल्या वाशीम जिल्ह्यात स्थानिक स्वराज्य संस्था निवडणुकीला आता रंगत आली आहे.
वत्सगुल्मनगरी अर्थात वाशीम जिल्ह्यात स्थानिक स्वराज्य संस्था निवडणुकीला आता रंगत आली आहे. येथे पाच ठिकाणी नगर परिषद आणि नगर पंचायतीची निवडणूक होत आहे. उमेदवारी अर्ज दाखल करण्याची प्रक्रिया आता आटोपली आहे. अध्यक्ष पदासाठी एकूण 83 उमदेवारांनी अर्ज दाखल केला आहे. नगर परिषद, नगर पंचायत सदस्य पदासाठी 1 हजार 63 नामनिर्देशनपत्र दाखल झाले आहेत. वाशीम जिल्ह्यातील चार नगर परिषद व एका नगर पंचायतीच्या निवडणुकीसाठी नामनिर्देशनपत्र दाखल करण्यासाठी 10 नोव्हेंबरपासून सुरुवात करण्यात आली होती. अर्ज स्वीकृती प्रक्रिया सोमवार, 17 नोव्हेंबर रोजी संपली. आता या निवडणुकीत खऱ्या प्रचाराला सुरुवात झाला आहे.
उमेदवारी अर्ज दाखल करण्याच्या शेवटच्या दिवसापर्यंत वाशीम जिल्ह्यात अध्यक्ष पदासाठी एकूण 83 जणांनी अर्ज दाखल केला. सदस्य पदासाठी 1 हजार 63 नामनिर्देशनपत्र दाखल करण्यात आले आहेत. या नामनिर्देशनपत्रांची छाननी आता करण्यात येणार आहे. छाननीनंतर अंतिम उमेदवारांच्या नावाची यादी प्रकाशित करण्यात येणार आहे. निवडणूक निर्णय अधिकाऱ्यांच्या निर्णयाविरुद्ध अपिल नसलेल्या ठिकाणी 21 नोव्हेंबर अर्ज मागे घेता येणार आहे. अपिल असलेल्या ठिकाणी 25 नोव्हेंबर ही उमेदवारी अर्ज मागे घेण्याची अंतिम मुदत असेल.
लवकरच यादी
अर्ज प्रक्रियेची छाननी झाल्यानंतर वाशीम जिल्ह्यात नगर परिषद, नगर पंचायतनिहाय उमेदवारांची यादी जाहीर करण्यात येणार आहे. त्यानंतर अर्ज मागे घेण्याची प्रक्रिया सुरू राहणार आहे. अंतिम उमेदवार यादी प्रकाशित करण्याची तारीख 26 नोव्हेंबर आहे. वाशीम जिल्ह्यात नगर परिषद व नगर पंचायतनिहाय 10 ते 17 नोव्हेंबर पर्यंत उमेदवारी अर्ज स्वीकारण्यात आले आहेत. आता या अर्जांची छाननी करण्यात येत आहे. सर्वाधिक रंगत सध्या वाशीम शहरात बघायला मिळत आहे. वाशम नगर परिषदेत अध्यक्ष पदासाठी एकूण 32 अर्ज दाखल झाले आहेत. सदस्य पदासाठी एकूण 385 नामनिर्देशनपत्र प्राप्त झाले आहेत. 17 नोव्हेंबर रोजी अध्यक्ष पदासाठी 21 अर्ज दाखल झालेत. सदस्य पदासाठी 90 जणांनी अर्ज भरले. त्यामुळे एकूण 211 नामनिर्देशन अर्ज प्राप्त झाले आहेत.
कारंजा नगर परिषद अध्यक्षपदासाठी एकूण 15 अर्ज दाखल झाले आहेत. सदस्य पदासाठी एकूण 246 नामनिर्देशनपत्र प्राप्त झाले आहेत. 17 नोव्हेंबर रोजी अध्यक्ष पदासाठी 12 जणांनी अर्ज भरला. सदस्य पदासाठी 103 जणांनी अर्ज दाखल केला. एकूण 115 नामनिर्देशन अर्ज प्राप्त झाल्याचे अधिकाऱ्यांनी सांगितले. रिसोड नगर परिषदेतही चूरस बघायला मिळत आहे. अध्यक्ष पदासाठी एकूण 13 अर्ज दाखल झाले आहेत. सदस्य पदासाठी दाखल झालेल्या एकूण अर्जांची संख्या 187 आहे. 17 नोव्हेंबरला अध्यक्ष पदासाठी तीन अर्ज दाखल झालेत. सदस्य पदासाठी 53 असे एकूण 56 नामनिर्देशन अर्ज प्राप्त झाले आहेत.
मंगरूळपीर नगर परिषदेत अध्यक्ष पदासाठी अर्ज करणाऱ्यांची संख्या एकूण 14 आहे. सदस्य पदासाठी एकूण 162 अर्ज दाखल आहेत. 17 नोव्हेंबरला अध्यक्ष पदासाठी चार जणांनी अर्ज दाखल केला. सदस्य पदासाठी 48 अर्ज प्राप्त झालेत. त्यामुळे अर्जांची संख्या 52 झाली आहे. मालेगाव नगर पंचायतीसाठी देखील निवडणूक होत आहे. अध्यक्ष पदासाठी एकूण नऊ अर्ज दाखल आहेत. सदस्य पदासाठी दाखल अर्जांची संख्या 83 आहे. 17 नोव्हेंबरला अध्यक्ष पदासाठी तिघांनी उमेदवारी अर्ज दाखल केला. सदस्य पदासाठी 28 अर्ज प्राप्त झाले. त्यामुळे एकूण 28 नामनिर्देशन अर्ज प्राप्त झाल्याचे अधिकाऱ्यांनी सांगितले.
