काँग्रेसचा बायबायचा ‘हात’ देत आशिष देशमुख भाजपमध्ये आलेत. तेव्हापासून त्यांनी आजपर्यंत कधीही पक्षाबद्दल नाराजी व्यक्त केली नाही. पण आता असं झालं आहे.
स्थानिक स्वराज्य संस्थांची निवडणूक सध्या सुरू आहे. नगर परिषद आणि नगर पंचायत निवडणूक अंतिम टप्प्यात आहे. त्यानंतर जिल्हा परिषद, पंचायत समिती निवडणूक होणार आहे. यानंतर महापालिका निवडणूक होणार आहे. अशाच निवडणुकीपूर्वी पक्षांतराचं पीक वर आलं आहे. काँग्रेस आणि राष्ट्रवादी काँग्रेस शरद पवार यांच्या पक्षातून अनेक जण बाहेर पडत आहेत. बहुतांश भाजपकडे वळले आहे. काहींनी दादांच्या पार्टीचा रस्ता धरला आहे. उर्वरित शिवसेना एकनाथ शिंदे यांच्या पक्षाचा झेंडा हाती घेत आहेत. असेच पक्षांतर सध्या सावनेर मतदारसंघात सुरू आहे. नागपूर जिल्हा परिषद निवडणुकीच्या अनुषंगाने हे बदल होत आहेत.
जिल्हा परिषद, पंचायत समिती निवडणुकीपूर्वी काँग्रेसचा साथ सोडत अनेकांनी भाजपची वाट धरली आहे. काँग्रेस नेते सुनील केदार यांचं आतापर्यंत सावनेर, कळमेश्वर आदी भागात अबाधित वर्चस्व होतं. नागपूर जिल्हा परिषदेचा अध्यक्ष कोण होईल, हे केदार ठरवायचे असं बोललं जात होतं. मात्र केदार यांच्या सत्तेला आता उतरती कळा लागली आहे. जिल्हा मध्यवर्ती बँक घोटाळा प्रकरणात केदार यांना कोर्टानं शिक्षा ठोठावली आहे. त्यामुळं त्यांचं आमदारकीचं पद गेलं आहे. निवडणुकीत केदार यांच्या पत्नी देखील पराभूत झाल्या आहेत.
भाऊंना पाठ, बाहेरचे दार
उतरती कळा लागल्यानं सुनील केदार यांचं दार अनेकांनी सोडणं सुरू केलं आहे. ते आता भाजपमध्ये जात आहेत. काँग्रेसला सोडून अलीकडेच काही मंडळी नागपूर ग्रामीण भाजपमध्ये दाखल झाली. मात्र या पक्ष प्रवेशामुळं भाजपचे आमदार आशिष देशमुख चांगलेच नाराज झाले आहेत. यावरून त्यांनी थेट पक्ष नेतृत्वाशी पंगा घेतला आहे. काँग्रेसचे पदाधिकारी नरेंद्र पिंपळे हे भाजपमध्ये आलेत. अमित राय, विक्की पाटील हे देखील त्यांच्या सोबत होते. संदीप नारनवरे, सचिन राय, चंद्रकांत शेंडे यांनाही भाजपनं घेतलं.
रणजीत बागडे, अतुल ढोरे, बॉबी गजभिये यांच्यासह अनेक कार्यकर्ते भाजपमध्ये आलेत. महसूल मंत्री चंद्रशेखर बावनकुळे यांच्या उपस्थितीत हा पक्ष प्रवेश झाला. मात्र याच कार्यक्रमात नाराजी व्यक्त करीत आमदार देशमुख चक्क कार्यक्रम स्थळावरून निघुन गेले. आमदार देशमुख यांनी काँग्रेसमधून भाजपात आलेल्या नेत्यांच्या प्रवेशाबद्दल नाराजी व्यक्त केली. वाळू माफियांना पक्षात घेतल्यामुळे आशिष देशमुख यांनी जाहीरपणे नाराजी व्यक्त केली.
सुनील केदार यांचे कार्यकर्ते नरेंद्र पिंपळे आणि अमित राय हे देखील भाजपमध्ये आलेत. त्यावरून देशमुख रोखठोक बोलले. भाजपने संबंधित पदाधिकाऱ्यांचे पक्ष प्रवेश मागे घ्यावे, असे ते म्हणाले. पक्ष प्रवेश मागे घेतले नाही, तर सत्याग्रहाची भाषा त्यांनी केली. जाहीरपणे आमदार देशमुख यांनी हा इशारा दिला. सावनेर येथे नगर परिषद निवडणूक होत आहे. त्यावेळी भाजप उमेदवारांच्या पक्ष कार्यालयाचे उद्घाटन करण्यात आलं. याच कार्यक्रमात देशमुख यांनी नाराजी व्यक्त केली. त्यानंतर तडकाफडकी कार्यक्रम सोडून ते निघुन गेले. देशमुख यांच्या या नाराजीमुळे केदारांच्या कार्यकर्त्यांना घेतल्यामुळे बाप्पू भडकले, अशी चर्चा राजकीय वर्तुळात रंगली आहे.
