अमरावतीतील एका कार्यक्रमात बोलताना त्यांनी भाजप आणि काँग्रेस दोन्ही पक्षांवर जोरदार हल्ला चढवला. स्वामिनाथन आयोग असो किंवा शेतीमालाला हमीभाव, दोन्ही पक्षांनी दिलेली आश्वासने केवळ जुमले ठरली, असे सांगत त्यांनी सरकारवर तिखट शब्दांत टीका केली.
शेतकऱ्यांच्या नावाने सत्ता मिळवणाऱ्या पक्षांना खरेतर शेतकऱ्यांचे काहीच देणे-घेणे नाही,असा घणाघाती आरोप आमदार बच्चू कडू यांनी केला आहे. अमरावतीच्या पलासखेड येथे शिव जयंतीच्या निमित्ताने आयोजित कार्यक्रमात बोलताना त्यांनी काँग्रेस आणि भाजप या दोन्ही राष्ट्रीय पक्षांवर कठोर टीका केली. कोणतीही पार्टी आली तरी ती शेतकऱ्यांच्या हितासाठी काम करत नसल्याचे म्हणत त्यांनी राजकीय पक्षांची पोलखोल केली. बच्चू कडू यांनी स्पष्ट शब्दांत सांगितले की, “छत्रपती शिवाजी महाराजांनी या देशात पितृसत्ताक व्यवस्थेचा अंत केला, परंतु आज असे पराक्रमी राजे कुठे दिसत नाहीत. ते म्हणायचे की जर शेतकऱ्यांच्या ताटाला हात लावाल, तर हात कापला जाईल. मात्र, आजच्या सरकारांनी शेतकऱ्यांचा घास हिसकावून घेतला आहे.” त्यांच्या या वक्तव्याने राजकीय वर्तुळात खळबळ उडाली आहे.
भाजपने 50% नफा ठेवून शेतीमालाचे दर देऊ असे आश्वासन दिले होते, पण प्रत्यक्षात शेतकऱ्यांना तो फायदा झाला नाही. त्याचवेळी, काँग्रेसने स्वामिनाथन आयोग लागू करण्याचे वचन दिले, पण सत्ता मिळाल्यावर त्यांनी देखील त्याकडे पाठ फिरवली. निवडणुका आल्या की राजकीय पक्षांना शेतकऱ्यांची आठवण येते, पण सत्ता मिळाल्यावर ते त्यांच्या गरजा आणि प्रश्नांकडे दुर्लक्ष करतात. शेतकरी आत्महत्या करत असताना, त्याच शेतकऱ्यांच्या नावे राजकीय पक्ष आपली तुंबडी भरत आहेत, असे बच्चू कडू यांनी भाजप आणि काँग्रेस या दोन्ही पक्षांवर गंभीर आरोप लावताना सांगितले. यामुळे शेतकरी नेहमीच फसवले जात असल्याचे ते म्हणाले.
सरकार फक्त उद्योगपतींसाठी
आजचे सरकार शेतकऱ्यांसाठी नाही, तर केवळ उद्योगपतींसाठी काम करत आहे. सरकारच्या धोरणांमुळे मोठे उद्योगपती श्रीमंत होत आहेत आणि शेतकरी मात्र कर्जबाजारी होत आहेत. खतांच्या, बियाण्यांच्या आणि वीज बिलांच्या वाढत्या किंमतींनी शेतकऱ्यांचे कंबरडे मोडले आहे, पण सरकार मात्र त्याकडे कानाडोळा करत असल्याचा हल्ला सरकारवर चढवताना बच्चू कडू यांनी सांगितले. जर शेतकऱ्यांचा आवाज दडपण्याचा प्रयत्न झाला, तर रस्त्यावर उतरून लढा देऊ. आता शेतकऱ्यांनी कोणत्याही पक्षाच्या भूलथापांना बळी न पडता, स्वतःच्या हक्कासाठी लढण्याची गरज आहे, असा इशारा त्यांनी सरकारला दिला.
राजकीय वातावरण तापले
बच्चू कडू यांच्या या आक्रमक वक्तव्यामुळे महाराष्ट्राच्या राजकीय वर्तुळात खळबळ उडाली आहे. भाजप आणि काँग्रेसच्या नेत्यांनी त्यांच्या आरोपांना प्रत्युत्तर देण्यासाठी बैठका घेतल्या आहेत. यावर भाजपने प्रतिक्रिया देताना सांगितले की, “आम्ही नेहमीच शेतकऱ्यांसाठी काम केले आहे, आणि करत राहू.” तर काँग्रेसने स्पष्टीकरण देत सांगितले की, “आम्ही स्वामिनाथन आयोग लागू करण्याचा प्रामाणिक प्रयत्न केला होता.”मात्र, शेतकरी अजूनही या पक्षांच्या आश्वासनांवर विश्वास ठेवतील की आता ते स्वतःसाठी नवा मार्ग शोधतील, हे येणाऱ्या काळात स्पष्ट होईल.
