भंडारा-गोंदिया जिल्ह्याच्या विकासासाठी सदैव तत्पर असलेले भाजपचे माजी मंत्री आमदार डॉ. परिणय फुके यांनी मुंबईतील लालबागच्या राजाचे दर्शन घेऊन सुख-समृद्धीसाठी प्रार्थना केली.
महाराष्ट्रात गणेशोत्सवाचा उत्साह पुन्हा एकदा उसळला आहे. 27 ऑगस्ट 2025 पासून विघ्नहर्ता गणपती बाप्पाच्या स्वागतासाठी संपूर्ण राज्य भक्तिमय झाले आहे. रस्त्यांवर ढोल-ताशांचा नाद, मोदकांचा गोड सुगंध आणि मिरवणुकींचा जल्लोष यांनी वातावरणात चैतन्य पसरले आहे. प्रत्येक घर सजले आहे. तर प्रत्येक मनात भक्तीचा उल्हास दाटला आहे. गणरायाच्या आगमनाने केवळ सामान्य भक्तच नव्हे, तर राजकीय नेतेही या उत्सवात रंगलेले दिसत आहेत. प्रत्येकजण बाप्पाच्या चरणी आपल्या मनोकामना घेऊन नतमस्तक होत आहे. भाजपचे विद्यमान नेते तथा माजी मंत्री आमदार डॉ. परिणय फुके यांनी देखील बाप्पाच्या चरणी नतमस्तक झाले.
मुंबईतील लालबागच्या राजाच्या दर्शनासाठी सहकुटुंब हजर झालेल्या डॉ. फुके यांनी गणरायासमोर सुख, समृद्धी आणि सुदृढ आरोग्याची प्रार्थना केली. लालबागचा राजा, जो लाखो भक्तांच्या श्रद्धेचा केंद्रबिंदू आहे, त्याच्या चरणी नतमस्तक होताना त्यांच्या चेहऱ्यावर प्रसन्नता आणि मनात ऊर्जा दिसून आली. भक्तीने गजबजलेले वातावरण, आरतीचे मंगलमय स्वर आणि गणरायाच्या करुणामय मूर्तीसमोर उभे राहताना त्यांना एक विलक्षण शक्ती प्राप्त झाल्याचे त्यांनी सांगितले. ही शान कोणाची? लालबागच्या राजाची असा जयघोष करत त्यांनी आपल्या भावना व्यक्त केल्या. भंडारा-गोंदिया जिल्ह्याच्या विकासासाठी अहोरात्र झटणारे आमदार डॉ. परिणय फुके यांनी लालबागच्या राजासमोर एक खास साकडे घातले.
Chandrashekhar Bawankule : फडणवीसांना लक्ष्य करण्यामागे जातीय राजकारण
शेतकऱ्यांसाठी प्रार्थना
विदर्भातील मागासलेपण आणि विशेषतः भंडारा-गोंदिया जिल्ह्याच्या विकासाला गती देण्यासाठी त्यांनी गणरायाकडे शक्ती आणि सामर्थ्य मागितले. मला इतकी शक्ती दे, की मी कोणत्याही अडथळ्याविना सरकारकडून निधी आणून या जिल्ह्याचा कायापालट करू शकेन, अशी भावपूर्ण प्रार्थना त्यांनी केली. विदर्भ हा नेहमीच विकासाच्या बाबतीत मागे राहिला आहे. भंडारा-गोंदिया तर त्यातही अधिक संथगतीने पुढे सरकत आहे. पण डॉ. फुके यांनी आपल्या कार्यकुशलतेने आणि दृढनिश्चयाने या भागात विकासाची वैनगंगा वाहू लागली आहे. त्यांनी केवळ जिल्ह्याच्या विकासापुरते साकडे घातले नाही, तर महाराष्ट्रातील शेतकऱ्यांच्या कल्याणासाठीही प्रार्थना केली.
महाराष्ट्र सुजलाम-सुफलाम व्हावा, शेतकऱ्यांच्या समस्या सुटाव्या आणि त्यांना कर्जमाफी मिळावी, अशी मागणी त्यांनी गणरायाकडे केली. गणपती बाप्पाच्या चरणी साकडं घालतांना त्यांनी या सर्व मनोकामना पूर्ण होण्याची आशा व्यक्त केली. त्यांच्या या भक्तीमय आणि विकासकेंद्रित दृष्टिकोनामुळे भंडारा-गोंदियातील जनता त्यांच्यावर प्रेम आणि विश्वास ठेवते. डॉ. फुके यांचा हा प्रयत्न केवळ राजकीय नाही, तर त्यात सामाजिक आणि सांस्कृतिक जोड आहे. गणेशोत्सवाच्या या पवित्र वातावरणात त्यांनी लालबागच्या राजाच्या दर्शनातून प्रेरणा घेतली आहे. ती प्रेरणा ते आपल्या कार्यात उतरणार आहेत. भंडारा-गोंदियाच्या विकासासाठी त्यांचा हा संकल्प आणि गणरायाच्या आशीर्वादाने येत्या काळात या भागात समृद्धीची गंगा खळखळून वाहणार, यात शंका नाही.
Sudhir Mungantiwar : विघ्नहर्त्याच्या भक्तीत आमदार झाले विलीन
