महाराष्ट्रातील राजकारण सध्या गढूळ झालेले आहे. सरकारने काढलेल्या जीआर नंतरही मराठा आरक्षणावाद अजून शांत झालेला नाही.
महाराष्ट्राच्या राजकीय रंगमंचावर सध्या मराठा आरक्षणाचा तमाशा जोरदार रंगतोय. मुंबईच्या आझाद मैदानात मनोज जरांगे पाटील यांनी पाच दिवसांचे आमरण उपोषण करत सरकारला निर्णय घेण्यास भाग पडले. अखेर सरकारने काही मागण्या मान्य करत जीआर काढला. पण हा वाद शांत होण्याचे नावच घेत नाही. आता तर महायुतीमधेच श्रेयवादाची ठिणगी पडली आहे. मनोज जरांगे यांनी आझाद मैदानात तंबू ठोकताच सरकारची धावपळ उडाली. अखेर मराठा समाजाच्या मागण्यांना मान्यता देणारा जीआर काढण्यात आला. यामुळे मुख्यमंत्री देवेंद्र फडणवीस यांनी मास्टरस्ट्रोक मारल्याची चर्चा रंगली.
परंतु हा मास्टरस्ट्रोक खरंच फडणवीसांचा आहे की महायुतीच्या एकत्रित प्रयत्नांचा? यावरूनच आता महायुतीत अंतर्गत खलबतं सुरू झालीत. अनंत चतुर्दशीच्या शुभमुहूर्तावर राज्यातील दैनिकांमध्ये ‘देवाभाऊ’च्या नावाने मोठमोठ्या जाहिराती झळकल्या. पण या जाहिरातींचा सोर्स काय? कोणी दिल्या या जाहिराती? हा प्रश्न सोशल मीडियावर गाजतोय. राजकीय गल्लीबोळातही याचीच चर्चा आहे. मराठा आरक्षणासाठी तीन महत्त्वाचे जीआर काढल्यानंतर भाजपने ‘देवाभाऊ’ कँपेनला जोरदार सुरुवात केली. मुंबई आणि ठाण्यात फडणवीसांच्या नावाने बॅनर्स लागली. ज्यावर ‘देवाभाऊ’ असा भलामोठा उल्लेख आहे.
गरीबांचा विकास अजेंडा
छत्रपती शिवाजी महाराजांना नमन करताना फडणवीसांचा फोटो आणि ‘ना जातीचा, ना पातीचा, फक्त गोरगरीबांचा देवमाणूस’ असा मजकूर बॅनरवर झळकतोय. पण या बॅनरबाजी मागे नेमकं कोण आहे? हे गूढ अजूनही कायम आहे. काहींच्या मते, ही भाजपची रणनीती आहे, तर काहींना वाटतंय की हा श्रेय लाटण्याचा डाव आहे. दुसरीकडे, उपमुख्यमंत्री एकनाथ शिंदे यांनी यावर सूचक प्रतिक्रिया देत म्हटले, आम्ही श्रेयवादाच्या खेळात नाही. शिंदे यांनी मराठा आणि ओबीसी समाजाला न्याय देण्याचे श्रेय संपूर्ण महायुतीला दिले. आम्ही एक टीम आहोत. गोरगरीबांचा विकास हाच आमचा अजेंडा आहे, असं म्हणत त्यांनी फडणवीसांच्या ‘देवाभाऊ’ कँपेनला नर्मपणे टोला लगावला. पण हा टोला किती खोलवर जखम करेल, हे येणारा काळच ठरवेल.
मराठा आरक्षणासाठी मनोज जरांगे यांच्या आंदोलनाला यश मिळाले. सरकारने तीन जीआर काढत त्यांच्या प्रमुख मागण्या मान्य केल्या. यासाठी राधाकृष्ण विखे पाटील यांच्या नेतृत्वाखालील मराठा उपसमितीने महत्त्वाची भूमिका बजावली. जरांगे यांनीही सरकारचे कौतुक करत समाधान व्यक्त केले. पण या यशाचे खरे श्रेय कोणाला? हा प्रश्न अजूनही अनुत्तरित आहे. भाजपच्या बॅनरबाजीने आणि जाहिरातींनी हा वाद आणखी चिघळलाय. मुंबई-ठाण्यातील ‘देवाभाऊ’ बॅनर्स आणि वृत्तपत्रांमधील जाहिरातींनी राजकीय वातावरण तापलंय. ‘छत्रपती शिवरायांचा वारसदार‘ असा उल्लेख करत फडणवीसांना मराठा समाजाचा तारणहार ठरवलं जातंय. पण या सगळ्या गदारोळात शिंदे गट आणि इतर महायुती घटक कुठे आहेत? हा प्रश्न अनेकांना पडलाय. एकंदरीत, मराठा आरक्षणाचा हा तमाशा आता निवडणुकीच्या रणधुमाळीत आणखी रंगत आणणार, हे नक्की.
Ladki Bahin Scheme : जाहिरातीमध्ये हसरा चेहरा, बँक खात्यात मात्र रिकामेपणा
