महाराष्ट्रातील कला, क्रीडा आणि कार्यानुभव निदेशकांचा संघर्ष हा केवळ वेतनासाठी नाही, तर त्यांच्या सन्मान आणि हक्कांसाठी आहे. विद्यार्थ्यांच्या सर्वांगीण विकासात मोलाचे योगदान देणाऱ्या या शिक्षकांच्या मागण्या आज शिक्षण क्षेत्रातील सुधारण्याचे नवे पर्व ठरत आहेत.
महाराष्ट्राच्या शिक्षण क्षेत्रात कार्यरत असणाऱ्या कला, क्रीडा आणि कार्यानुभव निदेशकांच्या व्यथा आता समोर येत आहेत. या क्षेत्रातील कर्मचारी गेल्या अनेक वर्षांपासून आपल्या कर्तृत्वाने विद्यार्थ्यांच्या जीवनाला आकार देत आहेत. परंतु त्यांच्या श्रमांचा योग्य मोबदला मिळवण्यासाठी त्यांना अजूनही संघर्ष करावा लागत आहे. याबाबतच जनता शिक्षक महासंघ महाराष्ट्राच्या प्रतिनिधींनी भाजपचे माजी मंत्री आणि आमदार डॉ. परिणय फुके यांची भेट घेऊन या समस्यांना वाचा फोडली. त्यांच्या या भेटीने शिक्षण क्षेत्रातील या उपेक्षित घटकांच्या मागण्यांना नव्याने बळ मिळाले आहे.
राज्यातील जिल्हा परिषदेच्या शाळांमध्ये कार्यरत असणारे हे कर्मचारी विद्यार्थ्यांना केवळ पुस्तकी ज्ञानच नव्हे, तर कला, क्रीडा आणि कार्यानुभवाच्या माध्यमातून जीवनकौशल्ये शिकवतात. त्यांच्या या योगदानामुळे विद्यार्थ्यांचे सर्वांगीण विकास घडतो. परंतु, त्यांच्या मेहनतीला योग्य सन्मान आणि आर्थिक पाठबळ मिळालेले नाही. या भेटीत, या कर्मचाऱ्यांनी आपल्या दीर्घकाळच्या समस्यांना ठळकपणे मांडले. त्यांच्या मागण्यांसाठी सरकार दरबारी आवाज उठवण्याची विनंती केली. डॉ. फुके यांनी या मागण्यांवर सविस्तर चर्चा करून त्यांना सकारात्मक आश्वासन दिले.
वेतनाची मागणी
राज्यात सुमारे 3 हजार 400 कला, क्रीडा आणि कार्यानुभव निदेशक जिल्हा परिषदेच्या शाळांमध्ये आपली सेवा देत आहेत. यापैकी 1 हजार 367 कर्मचाऱ्यांना मुंबई उच्च न्यायालयाने पूर्णकालीन शिक्षकांच्या 50 टक्के वेतन देण्याचे आदेश दिले होते. परंतु, या आदेशाची अंमलबजावणी अद्याप पूर्णपणे झालेली नाही. गेल्या 13-14 वर्षांपासून हे कर्मचारी अत्यल्प वेतनावर काम करत आहेत. ज्यामुळे त्यांच्या जीवनमानावर गंभीर परिणाम झाला आहे. त्यांच्या या मागणीला आता न्याय मिळणे गरजेचे आहे.
या कर्मचाऱ्यांनी केवळ वेतनवाढीचीच मागणी केलेली नाही, तर त्यांनी कक्षा 6 ते 8 आणि 100 पट संख्येची अट रद्द करण्याची विनंतीही केली आहे. ही अट रद्द झाल्यास त्यांच्या कामाचे स्वरूप अधिक व्यापक आणि प्रभावी होईल. त्यांच्या या मागण्यांमुळे शिक्षण क्षेत्रात सुधारणा घडवण्याची संधी निर्माण होऊ शकते. विद्यार्थ्यांना दर्जेदार शिक्षण देण्यासाठी या कर्मचाऱ्यांचे योगदान महत्त्वाचे आहे. त्यांच्या मागण्यांकडे दुर्लक्ष करणे म्हणजे शिक्षणाच्या गुणवत्तेला बाधा आणण्यासारखे आहे.
Atul Save : मागासवर्गीय विद्यार्थ्यांच्या आयुष्यात उजाडला नव्या संधींचा सूर्य
डॉ. परिणय फुके यांनी या भेटीत कर्मचाऱ्यांच्या मागण्यांवर सखोल चर्चा केली. सरकारशी संवाद साधून या समस्यांचे निराकरण करण्याचे आश्वासन दिले. त्यांच्या या सकारात्मक दृष्टिकोनामुळे कर्मचाऱ्यांमध्ये नवीन आशा निर्माण झाली आहे. या भेटीत जनता शिक्षक महासंघाचे पदाधिकारी आणि इतर मान्यवर उपस्थित होते. ज्यांनी या मागण्यांना पाठिंबा दर्शवला. हा लढा केवळ वेतनाचा नाही, तर शिक्षण क्षेत्रातील कर्मचाऱ्यांच्या सन्मानाचा आणि त्यांच्या योगदानाला योग्य मूल्य मिळवण्याचा आहे. येत्या काळात या मागण्यांवर काय निर्णय होतो, हे पाहणे औत्सुक्याचे ठरेल.
