भंडारा जिल्ह्यातील दोन नगर परिषदेमध्ये होत असलेला भ्रष्टाचार आता चव्हाट्यावर येत आहे. त्यानुसार पवनी आणि भंडारा नगर परिषदेच्या मुख्याधिकाऱ्यांची चौकशी सुरू झाली आहे.
भंडारा जिल्ह्यातील दोन नगरपरिषद मधील भ्रष्टाचार सध्या चर्चेत आहे. भंडारा आणि पवनी या त्या दोन नगर परिषद. या दोन्ही नगर परिषदेतील मुख्याधिकाऱ्यांचे ‘काऊंट डाऊन’ आता सुरू झालं आहे. यासंदर्भात सर्वप्रथम ‘द लोकहित लाइव्ह’ने वृत्त प्रकाशित केले होते. भंडारा जिल्ह्यातील दोन नगर परिषदमधील मुख्याधिकाऱ्यांना लवकरच घरचा रस्ता धरावा लागेल हे ते वृत्त होते. आता जिल्हाधिकारी सावन कुमार यांनी दोन्ही अधिकाऱ्यांना कारणे दाखवा नोटीस बजावली आहे.
पवनी नगर परिषदेमध्ये सुमारे 200 कोटी रुपयांचा भ्रष्टाचार पुढे आला आहे. तेवढाच मोठा भ्रष्टाचार भंडारा नगर परिषदेत देखील आहे. यासंदर्भात भाजप नेते माजी मंत्री आमदार डॉ. परिणय फुके यांनी तक्रार केली होती. त्यानंतर पवनी आणि भंडारा येथील मुख्याधिकाऱ्यांची चौकशी सुरू करण्यात आली आहे. जिल्हाधिकारी सावन कुमार यांनी नोटीस बजावत दोन्ही अधिकाऱ्यांनी 72 तासात लेखी स्पष्टीकरण सादर करण्याचे आदेश दिले आहेत. त्यामुळे दोन्ही मुख्याधिकाऱ्यांना पुढचे 72 तास धडकी भरविणारे ठरणार आहेत.
भंडारा आणि पवनी नगर परिषदेमध्ये विविध प्रकारची कामे करण्यात आली. एकट्या पवनीत आतापर्यंत सुमारे 200 कोटी रुपयांची कामे करण्यात आली आहे. या कामांमध्ये मोठ्या प्रमाणावर भ्रष्टाचार झाल्याची तक्रार आमदार डॉ. फुके यांनी केली होती. याशिवाय भंडारा नगरपरिषदेमध्येही मोठा भ्रष्टाचार असल्याचे त्यांनी उघड केले होते. महसूल मंत्री चंद्रशेखर बावनकुळे यांच्या उपस्थितीत झालेल्या दिवाळी स्नेहमिलन कार्यक्रमामध्ये आमदार डॉ. फुके यांनी जाहीरपणे हा बॉम्ब टाकला होता.
दोघे घरी जाणार
भंडारा जिल्ह्यामधील नगरपरिषदेमध्ये होत असलेल्या भ्रष्टाचाराबाबत ‘द लोकहित लाइव्ह’ने वृत्त प्रकाशित केले होते. पवनी आणि भंडारा या दोन नगर परिषदेमधील मुख्याधिकारी निलंबित होऊ शकतात, असे ठामपणे या बातमीत नमूद करण्यात आले होते. आता दोन्ही नगर परिषदेतील भ्रष्टाचाराची चौकशी आता सुरू झाली आहे. पहिल्या टप्प्यामध्ये 25 कोटींच्या कामाबाबत स्पष्टीकरण देण्याचे आदेश मुख्याधिकाऱ्यांना देण्यात आले आहेत.
नगरपरिषदेच्या मुख्याधिकाऱ्यांनी आपल्या अधिकाराचा दुरुपयोग केल्याचा ठपका, जिल्हाधिकाऱ्यांनी कारणे दाखवा नोटीस मध्ये ठेवला आहे. नगर परिषदेमध्ये सुरू असलेल्या भ्रष्टाचाराबाबत आमदार डॉ. फुके यांना माहिती मिळाली होती. त्यामुळे त्यांनी आता एकापाठोपाठ भ्रष्ट अधिकाऱ्यांना निशाण्यावर घेतले आहे. चौकशीमध्ये भ्रष्टाचार उघडकीला आल्यास भंडारा जिल्ह्यातील दोन नगर परिषदेमधील मुख्याधिकाऱ्यांना निलंबन कारवाईला सामोरे जावे लागेल.
भ्रष्टाचार करणारे हे अधिकारी एका स्थानिक नेत्याच्या वरदहस्ताने सर्व प्रक्रिया करत होते. मिळालेल्या एकूण कमाईचा हिस्सा देखील या नेत्याला जात होता. त्यातील आता नगर परिषदेमध्ये कारवाई सुरू झाली आहे. त्यामुळे अधिकाऱ्यांचा वापर करून घेणारा नेताही धास्तावला आहे. नेता यात बाजूला राहणार असून अधिकारी बळीचा बकरा ठरणार आहेत. त्यामुळे ‘द लोकहित लाइव्ह’ने प्रकाशित केलेली बातमी तंतोतंत खरी ठरली आहे. ‘द लोकहित लाइव्ह’ स्वतःजवळ ठोस पुरावे आणि माहिती असल्याशिवाय एक शब्दही लिहित नाही, हे पुन्हा सिद्ध झाले आहे.
