बच्चू कडू यांनी नागपुरात केलेल्या आंदोलनावर आता तोडगा निघाला आहे. शेतकऱ्यांना कर्जमाफी देण्याची घोषणा सरकारने केली आहे. यासंदर्भात पोलिसांनीही न्यायालयात शपथपत्र दिले आहे.
नागपूरमधील राष्ट्रीय महामार्ग आणि इतर रस्ते आता वाहतुकीसाठी मोकळे झाले आहेत. प्रहारचे नेते माजी आमदार बच्चू कडू आणि त्यांचे समर्थक शेतकरी कर्जमाफीसाठी या भागात आंदोलन करत होते. हे सर्व मार्ग आंदोलकांपासून मोकळे करण्यात आले आहेत. पोलिसांनी मुंबई उच्च न्यायालयाच्या नागपूर खंडपीठात ही माहिती दिली. न्यायालयाने सर्व अधिकाऱ्यांना रस्ते किंवा रेल्वे वाहतुकीत आणखी अडथळा निर्माण होऊ नये, यासाठी आगाऊ पावले उचलण्याचे निर्देश दिले आहेत.
माजी मंत्री कडू आणि त्यांचे समर्थक राज्य सरकारशी झालेल्या चर्चेत अपयशी ठरल्यास ‘रेल रोको’ आंदोलनाची योजना आखत आहेत, अशी माहिती पोलिसांनी दिल्यानंतर उच्च न्यायालयाच्या नागपूर खंडपीठाने हे निर्देश दिले. ओमप्रकाश उर्फ बच्चू कडू यांच्या नेतृत्वाखाली हजारो निदर्शकांनी मंगळवार (28 ऑक्टोबर) पासून राष्ट्रीय महामार्ग आणि नागपूर शहराच्या बाहेरील इतर रस्त्यांवर महाएल्गार मोर्चा सुरू केला. यात संपूर्ण कर्जमाफीच्या मागणीसाठी वाहतूक रोखण्यात आली.
मोठा बंदोबस्त
बुधवारी (29 ऑक्टोबर) रोजी रजनीश व्यास यांच्या सुट्टीकालीन खंडपीठाने या आंदोलनाची स्वतःहून दखल घेतली. परवानगी नसतानाही आंदोलन सुरू असल्याचे न्यायालयाने नमूद केले. कडू आणि त्यांच्या समर्थकांना महामार्ग आणि इतर सर्व सार्वजनिक रस्ते तात्काळ रिकामे करण्याचे निर्देश दिले. नागपूर शहर पोलीस आयुक्त डॉ. रवींद्र सिंगल यांनी गुरुवारी (30 ऑक्टोबर) उच्च न्यायालयाला माहिती दिली की, राष्ट्रीय महामार्ग आणि इतर अडथळ्यांवरील सामान्य वाहतूक शांततेत सुरू झाली आहे.
आयुक्तांनी त्यांच्या शपथपत्रात म्हटले आहे की, सरकारशी चर्चा अयशस्वी झाल्यास कडू यांनी आता रेल रोको करण्याचा इशारा दिला आहे. आयुक्तांनी न्यायालयाकडे कडू यांना असे करण्यापासून रोखण्याचा आदेश देण्याची मागणी केली. त्यामुळे कायदा आणि सुव्यवस्थेचा गंभीर प्रश्न निर्माण होऊ शकतो. कडू यांनी सांगितले की, शेतकऱ्यांच्या मागण्यांसाठी मुख्यमंत्री देवेंद्र फडणवीस यांच्याशी झालेली चर्चा यशस्वी ठरली आहे. कडू यांचे वकील हरिओम ढगे यांनी न्यायालयाला सांगितले की, पीजेपी नेते यांनी रेल्वे रोको आंदोलन रद्द करण्याचा निर्णय घेतला आहे.
उच्च न्यायालयाने वकिलांचा हा युक्तीवाद हमी म्हणून स्वीकारला आहे. कडू यांच्याकडून मिळालेला चांगला संदेश निश्चितच एक आदर्श निर्माण करेल असे न्यायालयाने म्हटले. खंडपीठाने आपल्या आदेशात म्हटले आहे की, ते नागरिकांच्या सुरक्षिततेबद्दल आणि हक्कांबद्दल चिंतित आहे. त्यानंतर राष्ट्रीय महामार्ग आणि इतर रस्ते मोकळे करण्यात आले आहेत. पोलिसांनी गुरुवारी याबाबत उच्च न्यायालयाला शपथपत्र दाखल केले. न्यायालयाने सर्व अधिकाऱ्यांना रस्ते किंवा रेल्वे वाहतुकीत कोणताही अडथळा येऊ नये, यासाठी सक्षम पावले उचलण्याचे निर्देश दिलेत. माजी मंत्री आणि प्रहार जनशक्ती पक्षाचे (पीजेपी) नेते ओमप्रकाश उर्फ बच्चू कडू यांच्या नेतृत्वाखाली हजारो निदर्शकांनी नागपूर शहराच्या बाहेरील जामठ्याजवळ राष्ट्रीय महामार्गावर महाएल्गार मोर्चामध्ये भाग घेतला होता.
स्वत:हून दखल
न्यायमूर्ती रजनीश व्यास यांच्या सुट्टीकालीन खंडपीठाने स्वतःहून या प्रकाराची दखल घेत जनहित याचिका दाखल करून घेतली होती. त्यानंतर शेतकरी नेत्यांनी आपण न्यायालयाच्या आदेशांचा आदर करत असल्याचे स्पष्ट केले. मुख्यमंत्र्यांशी चर्चेला कडू रवाना झाल्यानंतर वाहतुकीसाठी सर्व मार्ग मोकळे करण्यात आलेत. नंतर रेल्वे रोको आंदोलन देखील रद्द करण्याचा निर्णय घेण्यात आला. रेल्वे वाहतुकीवर परिणाम झाला असता तर संबंधित विभागांना नोटीस बजावण्याशिवाय पर्याय नव्हता, असे न्यायालयाने म्हटले. खंडपीठाने रेल्वे मंत्रालय, नागपूरमधील मध्य रेल्वे अधिकारी, रेल्वे सुरक्षा बल (RPF) आणि रेल्वे पोलिसांना (GRP) नोटीस बजावली.
