नगर परिषदेमध्ये झालेला भ्रष्टाचार अखेर मुख्याधिकारी करण चव्हाण यांना भोवला आहे.
भाजप नेते माजी मंत्री आमदार डॉ. परिणय फुके यांनी व्यक्त केलेल्या जाहीर तक्रारीची राज्य सरकारकडून गंभीर दखल घेण्यात आली आहे. भंडारा नगर परिषदेमध्ये होत असलेल्या भ्रष्टाचाराबाबत आमदार फुके यांनी जाहीरपणे तक्रार केली होती. याप्रकरणी आता मुख्याधिकारी करण चव्हाण यांची बदली करण्यात आली आहे. करण चव्हाण यांच्या विरोधात कोणत्याही क्षणी कारवाई होऊ शकते, हे वृत्त ‘द लोकहित लाईव्ह’ने प्रकाशित केले होते. यासंदर्भात आदेश निघाल्याने हे वृत्त खरे ठरले आहे.
करण चव्हाण यांच्या जागी तुमसर नगर परिषदेतील मुख्याधिकारी जुम्मा प्यारेवाले यांची नियुक्ती करण्यात आली आहे. सध्या भंडारा नगर परिषदेमध्ये झालेल्या भ्रष्टाचार प्रकरणी चव्हाण यांना नोटीस बजावण्यात आली आहे. चौकशी पूर्ण झाल्यानंतर चव्हाण यांच्या विरोधात निलंबन कारवाई देखील होऊ शकते, असे पुरावे समोर येत असल्याची माहिती आहे. नगरपरिषदेतील अनेक कामांमध्ये भ्रष्टाचार झाला होता. यासंदर्भात भंडारा आणि पवनी येथील मुख्याधिकाऱ्यांबाबत आमदार परिणय फुके यांनी जाहीर नाराजी व्यक्त केली होती.
गंभीर दखल
माजी मंत्री आमदार परिणय फुके हे राजकीयदृष्ट्या वजनदार व्यक्तिमत्त्व आहे. त्यांनी टाकलेला कोणताही शब्द खुद्द मुख्यमंत्री देवेंद्र फडणवीस हे देखील कधी खाली जाऊ देत नाहीत. अशातच त्यांनी दोन नगरपरिषदेतील भ्रष्टाचार उघडकीस आणला. त्यामुळे सरकारने देखील या प्रकरणाची गंभीर दखल घेतली. जिल्हाधिकारी सावन कुमार यांनी भंडारा आणि पवनीच्या मुख्याधिकाऱ्यांना कारणे दाखवा नोटीस बजावली. आता याप्रकरणी चौकशी सुरू करण्यात येणार आहे. मात्र त्यापूर्वीच भंडारा नगर परिषदेचे मुख्याधिकारी करण चव्हाण यांना पदावरून दूर करण्यात आली आहे.
चौकशीला सुरुवात झाल्यानंतर करण चव्हाण हे हाताखालील कर्मचाऱ्यांवर दबाव आणू शकतात. भ्रष्टाचाराचे पुरावे नष्ट केले जाऊ शकतात, अशी भीती व्यक्त केली जात होती. त्यामुळे नगर विकास विभागाने तातडीने त्यांच्या बदलीचे आदेश काढले. चव्हाण यांची बदली झाल्यानंतर आता नगरपरिषदेतील संपूर्ण भ्रष्टाचाराच्या चौकशीचा मार्ग आणखी प्रशस्त झाला आहे. नगरपरिषदेमधील प्रकल्पांमध्ये भ्रष्टाचार करताना चव्हाण यांनी एक वाली शोधला होता. मात्र हा वाली देखील आता चव्हाण यांना वाचवू शकणार नाही असे चित्र आहे.
भंडारा नगर परिषदेनंतर आता पवनी नगर परिषदेमध्ये मुख्याधिकाऱ्यांविरुद्ध कोणती कारवाई होते? याकडे देखील सर्वांचे लक्ष लागले आहे. अशातच करण चव्हाण यांच्या विरोधात सुरू झालेल्या कारवाईच्या क्रमामुळे प्रशासकीय वर्तुळामध्ये खळबळ उडाली आहे. या चौकशीचे धागेदोरे करण चव्हाण यांच्या माध्यमातून कोणापर्यंत पोहोचतात? याची प्रतीक्षा आता सर्वांना आहे.
