अकोला जिल्ह्यात सध्या नगर परिषद आणि नगर पंचायत निवडणुकीत चूरशीची लढाई सुरू आहे. भाजप, वंचित, काँग्रेस आणि शिवसेना यांच्यात तिहेरी लढत आहे.
अत्यंत महत्वाच्या असलेल्या अकोला जिल्ह्यात सध्या प्रचंड राजकीय उलथापालथ सुरू आहे. नगर परिषद आणि नगर पंचायतीसाठी चूरस वाढतच आहे. अकोला जिल्ह्यात लढतीसाठी चौफेर राजकीय गुलाल उधळला जात आहे. अशात अनेक ठिकाणी भाजप आघाडीवर दिसत आहे. काही ठिकाणी महाविकास आघाडी, काँग्रेस, शिवसेना उद्धव बाळासाहेब ठाकरे पक्ष आणि वंचित बहुजन आघाडीची ताकद चांगलीच दिसत आहे. विजयसाठी महायुती, महाविकास आघाडी आणि वंचित बहुजन आघाडीचे नेते सध्या चांगलीच मेहनत घेताना दिसत आहेत.
अकोला जिल्ह्यात सहा ठिकाणी नगर परिषद, नगर पंचायत निवडणूक होत आहे. यात अकोट, मूर्तिजापूर, बाळापूर, तेल्हारा, हिवरखेड, बार्शीटाकळीचा समावेश आहे. या सर्व सहा ठिकाणी आतापर्यंत 72 अर्ज अध्यक्ष पदासाठी दाखल झाले आहेत. 931 उमदेवारी अर्ज सदस्यपदासाठी आहेत. यातील सर्वाधिक उमेदवारांची संख्या अकोट नगर परिषदेत आहे. त्याखालोखाल मूर्तिजापूर नगर परिषदेत अर्ज दाखल करणाऱ्यांची संख्या आहे. बार्शीटाकळीतही उमेदवारांची संख्या प्रचंड आहे. त्यामुळे या तीन स्थानिक स्वराज्य संस्थेमध्ये प्रचंड चढाओढ दिसत आहे.
आमदारांची ताकद
अकोला जिल्ह्यात सध्या तीन आमदार आणि एका माजी आमदाराने निवडणुकीसाठी शक्ती पणाला लावली आहे. मूर्तिजापूर विधानसभा मतदारसंघात मूर्तिजापूर नगर परिषदेची निवडणूक होत आहे. येथे भाजपचे आमदार हरीश पिंपळे यांचे वर्चस्व आहे. आमदार पिंपळे यांचा ‘ग्राऊंड कनेक्ट’ जोरदार आहे. विधानसभा निवडणूक जाहीर झाल्यानंतर त्यांची ताकद दिसली. पिंपळे यांचे नाव उशिराने जाहीर झाले. त्यावेळी मूर्तिजापुरातील प्रत्येक भाजप कार्यकर्ता रस्त्यावर उतरला होता. पिंपळे यांचे नाव जाहीर होताच सगळ्यांनी प्रचंड जल्लोष केला. त्यामुळे मूर्तिजापुरातील लोकांसाठी पिंपळे किती महत्वाचे आहेत, याची कल्पना येते. कार्यकर्त्यांना जोडून ठेवण्याचे कसब पिंपळे यांच्यात आहे. सलग दोन टर्म पिंपळे आमदार आहेत.
अहंकाराचा लवलेशही त्यांच्यात नाही. त्यामुळे पिंपळे यांच्या ताकदीनं मूर्तिजापूरमध्ये भाजप नगर परिषदेत मुसंडी मारेल असे दिसत आहे. मात्र येथे त्यांची टक्कर महाविकास आघाडीशी आहे. अकोटमध्येही भाजपची स्थिती भक्कम आहे. येथे आमदार प्रकाश भारसाकळे हे आमदार आहेत. त्यांनी काँग्रेस आणि वंचितला धोबीपछाड दिली आहे. अकोला पूर्व आणि अकोट या दोन्ही विधानसभा मतदारसंघातील विकास कामांचा अकोटमध्ये होण्याची चिन्हे आहेत. बाळापूरमध्ये शिवसेना उद्धव बाळासाहेब ठाकरे आमदार नितीन देशमुख हे जोर लाऊन आहेत. देशमुख हे सलग दहा वर्ष येथे आमदार आहेत. वंचित बहुजन आघाडीचे नेते तथा माजी आमदार नातीकोद्दीन खतीब हे त्यांच्या समोर आहेत. बाळापूर नगर परिषदेवर अनेक वर्ष खतीब घराण्याचे वर्चस्व राहिले आहे.
तीन ठिकाणी संघर्ष
तेल्हारा, हिवरखेड, बार्शीटाकळी येथे मात्र राजकीय युद्ध तुंबळ होणार आहे. यातील तेल्हारा हा अकोट विधानसभा मतदारसंघाचा भाग आहे. पूर्वी सांगितल्याप्रमाणे येथे दुसऱ्या सर्वाधिक उमेदवारांची संख्या आहे. हिवरखेडही याच मतदारसंघाचा भाग आहे. बार्शीटाकळी देखील मूर्तिजापूर मतदारसंघात जातो. सध्या अकोला जिल्ह्यात महाविकास आघाडी एकत्र आहे. महायुतीमध्ये सर्वच पक्ष स्वतंत्रपणे निवडणूक लढत आहेत. जवळपास सर्वच उमेदवारांनी अपक्ष म्हणून अर्ज दाखल केले आहेत.
