भाजप नेते माजी मंत्री आमदार डॉ. परिणय फुके यांच्यावर मनापासून प्रेम करणाऱ्यांची संख्या कमी नाही. पण अलीकडेच एक सोहळा असा रंगला की ओतप्रोत प्रेमानं त्यांचं उर भरून आलं.
भंडारा-गोंदियाच्या राजकारणातील खरे वजीर असलेले भाजप नेते माजी मंत्री आमदार डॉ. परिणय फुके यांच्यावर अंत:करणापासून प्रेम करणाऱ्यांची संख्या कमी नाही. ओबीसी समाजासाठी त्यांनी जे कार्य केलं, त्यानंतर तर पक्षीय राजकारण बाजूला ठेवत त्यांना साऱ्यांनीच मनापासून आपलं मानलं. ओबीसी समाजाच्या कार्यक्रमात तर खुद्द मुख्यमंत्री देवेंद्र फडणवीस यांनी डॉ. फुके यांनाच लोक सीएम मानतात असा गौरवपूर्ण उल्लेख केला. फुके यांच्यावरील सामान्यांच्या प्रेमाची प्रचिती अलीकडेच आयोजित एका कार्यक्रमात पुन्हा साऱ्यांना आली.
अगदी काही दिवसांपूर्वीच रक्षाबंधनाचा उत्सव साजरा झाला. बहिणींनी भावाच्या हातावर रक्षासूत्रं बांधलं. यानिमित्त भंडारा आणि गोंदियातील असंख्य लाडक्या बहिणी सरसावल्या. त्यांनी आपल्या लाडक्या दादाच्या हातावर रक्षासूत्र अर्थात राखी बांधली. राख्यांची संख्या इतकी होती की आमदार डॉ. परिणय फुके यांच्या हातावर एक सूतभरही जागा शिल्लक राहिली नाही. राखीच्या या बंधनातून दोन्ही जिल्ह्यातील बहिणींनी आमदार डॉ. परिणय फुके यांच्याप्रति असलेल्या आदरयुक्त प्रेमाची प्रचिती सर्वांना दिली.
अशक्य असं नाहीच
मुख्यमंत्री देवेंद्र फडणवीस यांचे अत्यंत विश्वासू सहकारी असलेले आमदार डॉ. परिणय फुके यांच्यासाठी अशक्य असं काहीच नाही, अशी भावना यावेळी अनेक महिलांनी व्यक्त केली. फुकेंनी टाकलेला शब्द मुख्यमंत्री कधीही व्यर्थ जाऊ देत नाहीत. सरकारी कर्मचाऱ्यांना सोशल मीडियावर शिस्त लावण्याचा निर्णय असो की भंडारा-गोंदिया जिल्ह्यातील वेगवेगळ्या निवडणुकीचा निकाल. डॉ. परिणय फुके यांनी आपली खरी ताकद दाखवून दिली आहे. हे सारं करीत असताना अहंकाराचा लवलेशही त्यांच्यात नसल्याची भावना महिलांनी यावेळी व्यक्त केली.
या अनोख्या रक्षाबंधन सोहळ्यानंतर आमदार डॉ. परिणय फुके यांनी महिलांशी संवाद साधला. वयाने ज्येष्ठ असलेल्या बहिणींचा आशीर्वाद घेतला. तर धाकट्या बहिणींना आपण सदैव सोबत असल्याचा विश्वास दिला. भंडाऱ्याच्या लाखनी येथील आदर्श नगरात भाजप महिला आघाडीच्यावतीने या कार्यक्रमाचं आयोजन करण्यात आलं होतं. आमदार असताना डॉ. परिणय फुके हे इतकं कार्य करून शकतात तर पुन्हा त्यांना मंत्रिपद मिळालं तर दोन जिल्ह्यांचा विकास निश्चित होईल, अशा भावना यावेळी व्यक्त झाल्या. राष्ट्रीय ओबीसी महासंघाचे राष्ट्रीय अध्यक्ष डॉ. बबनराव तायवाडे यांनीही देखील ही मागणी लावून धरली होती.
Prakash Ambedkar : आयोगाच्या वहीत पानं रिकामी, पण मतपेटीत कहर
सदैव देणार साथ
भंडारा-गोंदिया जिल्ह्यातील बहिणींच्या सामाजिक, आर्थिक आणि सर्वंकष प्रगतीसाठी आपण सदैव साथ देणार असल्याची ग्वाही यावेळी आमदार डॉ. फुके यांनी दिली. यावेळी ते म्हणाले, राखी हा केवळ एक धागा नाही. ते नात्यांचे मजबूत सूत्र आहे. आपल्या बहिणींची प्रगती व्हावी, म्हणून आपण प्रयत्नशील आहोतच. मुख्यमंत्री देवेंद्र फडणवीस यांनी मुहूर्तमेढ रोवलेल्या लाडकी बहीण योजनेचा डॉ. फुके यांनी आवर्जून उल्लेख केला. या योजनेमुळे बहिणींना आर्थिक आधार मिळाल्याचे त्यांनी सांगितले. भंडारा-गोंदिया जिल्ह्यातील महिलांच्या प्रगतीसाठी आपण मुख्यमंत्री देवेंद्र फडणवीस यांच्याकडे काही योजनांसाठी आग्रह करणार आहोत. मुख्यमंत्री फडणवीस केवळ या दोन जिल्ह्यातील नव्हे तर राज्यातील सर्व बहिणींच्या हितासाठी काम करीत असल्याचेही ते म्हणाले.
