महाराष्ट्राच्या राजकारणात सध्या स्थानिक निवडणुकीची रणधुमाळी रंगली आहे. आरक्षण सोडत जाहीर झाल्यानंतर पूर्व विदर्भाच्या राजकारणात निवडणुकीचे वारे आता अधिक वेगाने वाहत आहेत.
भंडारा जिल्ह्यातील नगर परिषदांच्या निवडणुकीत आता खरी मजा येणार आहे. राज्य निवडणूक आयोगाने नगराध्यक्ष पदांसाठी आरक्षण सोडत जाहीर केल्यानंतर, जिल्ह्यातील दिग्गज नेते आपल्या पत्नींना निवडणुकीच्या रणांगणात उतरवण्यासाठी कंबर कसली आहे. त्यातील काही नेते पत्नीसाठी प्रसंगी पक्षाशी फारकत घेण्याची तयारी करीत आहेत.
भंडारा, पवनी आणि साकोली या ठिकाणी महिलांसाठी राखीव झालेल्या पदांमुळे पुरुष इच्छुकांचा हिरमोड झाला असला, तरी हे नेते आता ‘पत्नी प्रथम’च्या धोरणाने पुढे सरसावले आहेत. या निवडणुकीत ‘भैय्या, दादा आणि भाऊ’ अशा बाहुबली नेत्यांमध्ये रस्सीखेच सुरू होणार आहे. काही पक्षीय फायनान्सर देखील आपल्या पत्नींना उभे करत आहेत. महाराष्ट्रात सध्या स्थानिक स्वराज्य संस्थांच्या निवडणुकीची धुमधडाका सुरू आहे. भंडारा जिल्ह्यात हे नाट्य आणखी रंगदार होत चालले आहे.
Charan Waghmare : ओबीसी लढ्यात राष्ट्रवादीच्या माजी आमदाराचा सहभाग
ओबीसी आरक्षणाच्या गुंतागुंतीमुळे गेल्या साडेतीन वर्षांपासून ही निवडणूक रखडल्या होत्या. 6 ऑक्टोबरला नगराध्यक्ष पदांचे आरक्षण घोषित झाले. भंडारा आणि पवनी येथे महिलांसाठी खुले प्रवर्ग राखीव झाल्याने, नेते आपल्या पत्नींना तयार करत आहेत. या बदलामुळे जुने गड तुटण्याची शक्यता आहे, तर नव्या चेहऱ्यांना संधी मिळेल. भंडारा जिल्ह्यातील हे राजकीय नाट्य आता ‘पुष्पा’ चित्रपटासारखे रंगू लागले आहे, जिथे नायक आपल्या पत्नीसाठी सर्व काही करतो. काही वर्षांपूर्वी ‘पुष्पा’ हा चित्रपट प्रदर्शित झाला, ज्यात नायक पुष्पा आपल्या पत्नीच्या सुखासाठी धडपडतो, शत्रूंचा सामना करतो आणि सर्व अडथळे पार करतो. आता भंडारा जिल्ह्यात हे चित्रपटातील दृश्य प्रत्यक्षात उतरताना दिसत आहे. येथील ‘भैय्या, दादा आणि भाऊ’ असे नेते आपल्या पत्नींना नगराध्यक्ष पदासाठी उभे करून, त्यांना यशस्वी करण्यासाठी रणनीती आखत आहेत.
बायकोसाठी काही पण
पूर्वी म्हणयाचे ‘एका यशस्वी पुरुषामागे एक स्त्री असते’, पण भंडाराच्या राजकारणात हे समीकरण उलट होत आहे. आता नेते आपल्या पत्नींना यशस्वी करण्यासाठी पडद्यामागून धडपडणार आहेत. या निवडणुकीत राजीनामा आणि पक्षांतर्गत कलह वाढण्याची शक्यता आहे, कारण जे नेते स्वतः मैदानात उतरण्याच्या तयारीत होते, त्यांना आता पत्नींना पुढे करावे लागत आहे. भंडारा नगर परिषदेत आता 17 प्रभाग आणि 35 सदस्य असणार आहेत. ज्यात पूर्वी 16 प्रभाग आणि 33 सदस्य होते. 2016-17 निवडणुकीत नगराध्यक्ष पद ओबीसीसाठी राखीव होते. पण आता महिला खुले प्रवर्गासाठी आहे. पवनी नगर परिषदेत 10 प्रभाग आणि 20 सदस्य असतील. ज्यात पूर्वी 8 प्रभाग आणि 17 सदस्य होते. 2016-17 मध्ये ओबीसी महिलांसाठी राखीव असलेले पद आता महिला खुले आहे.
CJI Bhushan Gavai : सरन्यायाधीशांवरील बुटफेकीविरोधात काळ्या झेंड्यांची लाट
साकोली नगर परिषदेतही 10 प्रभाग आणि 20 सदस्य असतील. 8 ऑक्टोबरला प्रभागनिहाय आरक्षण जाहीर होणार असून, त्यानंतर इच्छुकांना कोणत्या प्रभागातून लढायचे हे ठरेल. जिल्ह्यातील तीन नगर परिषदांमध्ये 100 जागा आणि 3 थेट नगराध्यक्ष पदांसाठी निवडणूक होणार आहेत. या बदलामुळे विकासकामांना लागलेला ब्रेक आता संपेल आणि जिल्ह्यात नवे वारे वाहू लागतील. नेते आपल्या पत्नींना उभे करत असल्याने, हे निवडणुकीचे मैदान ‘फॅमिली प्रोग्रॅम’ सारखे होत चालले आहे. पुष्पा चित्रपटातील जसा नायक आपल्या पत्नीला सर्व सुख देतो, तसेच येथील नेते आपल्या पत्नींना राजकीय यश देण्यासाठी प्रयत्न करत आहेत. मात्र, यात पक्षांतर्गत स्पर्धा आणि विरोधकांच्या खटल्यांचा सामना करावा लागेल.
