महाराष्ट्रातील शिवसेनेचे बोचरे बाण सध्या इकडेतिकडे विखुरत आहे. अकोला, नागपूरनंतर आता भंडाऱ्यातही शिंदेंचे हे अस्त्र भलतीकडे जाऊ लागले आहेत.
स्थानिक स्वराज्य संस्थांची निवडणूक तोंडावर आली असताना पूर्व विदर्भातील भंडारा जिल्ह्यातील शिवसेनेचे बाण अस्ताव्यस्त विखुरले आहेत. भाजप नेते माजी मंत्री आमदार डॉ. परिणय फुके यांनी आपल्या राजकीय बुद्धीबळाचा वापर करीत असा मोहरा आपल्याकडं ओढला आहे, जो लंकादहन करू शकतो. जॅकी रावलानी हे राजकारणाच्या सारीपाटावरील त्या मोहऱ्याचं नाव. जॅकी दादांवर विश्वास ठेवत शिवसेनेतून भाजपमध्ये दाखल झाले आहेत.
जॅकी दादांसोबत येताच धनुष्यावरील प्रत्यंचा सैल झाली आहे. भंडाऱ्यात शिवसेनेला हा मोठा धक्का बसला आहे. जॅकी रावलानी यांच्या भाजप प्रवेशापासून पूर्व विदर्भात राजकीय इनकमिंग आणि आउटगोइंगचा श्रीगणेशा झाला आहे. विशेष म्हणजे याचे श्रेय डॉ. फुके यांना जाणार आहे. भंडारा, गोंदिया या दोन्ही जिल्ह्याच्या राजकारणात दादाच वरचढ असल्याचा स्पष्ट संदेश यातून गेला आहे. अलीकडेच स्थानिक स्वराज्य संस्था निवडणुकीचे रणशिंग फुंकले गेले आहे. नगराध्यक्ष पदासाठीची आरक्षण सोडत जाहीर झाली आहे. वॉर्डांची रचना आणि त्यातील आरक्षण यावरही शिक्कामोर्तब झाले आहेत. अशात भंडाऱ्यात दादांनी शिवसेनेच्या तंबुतून अशाप्रकारे एकाला आपल्याकडे ओढले की सर्वांना धक्काच बसला.
Nagpur Police : ‘ऑपरेशन शक्ती’ने उद्ध्वस्त केला देहव्यवसायाचा गड
एकनाथ शिंदेंचे शिलेदार महाराष्ट्राची सिमा ओलांडल्यानंतर सेना फुटल्याची वार्ता सगळ्यांना कळली. त्याप्रमाणे जॅकींचा दादांसोबत फोटो सोशल माध्यमांवर झळकल्यानंतर भंडाऱ्यात राजकीय स्फोट झाला. भाजपमध्ये आल्यानंतर आता जॅकी हे दादांचे हात बळकट करणार आहेत. नगरपरिषद निवडणुकीचे लक्ष्य तीव्र बाणांनी भेदणे त्यामुळे भाजपला विशेषत: डॉ. फुके यांना आणखी सोपे होणार आहे. आमदार डॉ. परिणय फुके यांच्या नेतृत्वावर विश्वास ठेवत आपण भाजपमध्ये प्रवेश घेतल्याचं जॅकी आणि त्यांचे समर्थक सांगत आहेत.
पेलावे लागेल आव्हान
ऐन निवडणुकीपूर्वी झालेल्या या पक्ष प्रवेशामुळे भंडारा शिवसेनेत सर्व सुरळीत आहे ना? असा प्रश्न अनेकांना पडला आहे. जॅकी रावलानी हे शिवसेनेतून भारतीय जनता पार्टीमध्ये गेल्यामुळे या धक्क्यातून कसे सावरायचे, याचे चिंतन आणि चिंता काही नेत्यांना करावीच लागणार आहे. महायुतीचा धर्म पाळत विजय खेचून आणला जाईल असे संकेत, अलीकडेच डॉ. परिणय फुके यांच्याकडील नवदुर्गा उत्सवातील कार्यक्रमात मिळाले. कोणासोबतही न जाणारे खासदार तथा राष्ट्रवादी काँग्रेसचे कार्याध्यक्ष प्रफुल पटेल हे पुन्हा डॉ. परिणय फुके यांच्यासमवेत दिसले.
त्यावरून भाईजी आणि डॉक्टरांची ही जवळीक स्थानिक स्वराज्य संस्थेच्या निवडणुकीमध्ये नक्कीच कमाल करेल, हे स्पष्टपणे दिसू लागले. त्यातच डॉ. फुके यांनी जॅकी यांना आपल्या खेम्यात खेचले. परिणामी दिवाळीनंतर होणाऱ्या निवडणुकीत काही नेत्यांना फटाके लागणार हे निश्चित मानले जात आहे. जॅकी भाजपमध्ये आल्यानंतर कोणाला ‘ललकार’तात आणि कोणासाठी सुतळी बॉम्ब लावतात, हे लवकरच दिसणार आहे.
Gadchiroli : मुख्यमंत्र्यांच्या पालक जिल्ह्यात ओबीसींचा डंका
