महाराष्ट्राच्या राजकीय वर्तुळात स्थानिक स्वराज्य संस्थेच्या निवडणुकीचा धुराळा उडाला आहे. पूर्व विदर्भातील राजकारणही तापायला लागले आहे.
महाराष्ट्राच्या राजकीय आखाड्यात सध्या स्थानिक स्वराज्य संस्थांच्या निवडणुकीचा धुरळा उडाला आहे. पक्षांतर, रणनीती, बैठक सत्र आणि दौरे यांची मालिका सुरू आहे. पूर्व विदर्भात राजकीय समीकरणे झपाट्याने बदलताना दिसत आहेत. नगराध्यक्षपदाची रेस आता रंगतदार बनली आहे.
यंदा महिलांना प्राधान्य दिल्याने राजकीय खेळात नवा ट्विस्ट आला आहे. पुरुष नेत्यांचे स्वप्न भंगले आहे. त्यांनी आता आपल्या अर्धांगिनींना निवडणुकीच्या रणांगणात उतरविण्याचा विडा उचलला आहे. ‘पत्नीच्या यशासाठी काहीही’ असा नारा देत हे नेते आपल्या पत्नींना यशस्वी करण्यासाठी पडद्यामागे जोरदार तयारी करत आहेत.
निवडणुकीच्या निमित्ताने, भंडाऱ्यात राजकीय नाट्याला वेग आला आहे. जे माजी माजी आमदार कधीकाळी नाराजीवरून पक्ष सोडून गेले होते, ते आता पुन्हा मूळ पक्षात परतण्याच्या तयारीत आहेत. पण यामागचं कारण आहे, त्यांच्या पत्नींची राजकीय उमेदवारी.
या निवडणुकीत पत्नीला तिकीट मिळवून देण्यासाठी एका माजी आमदारांनी कंबर कसली आहे. यामुळे राजकीय वर्तुळात चर्चा रंगली आहे. भंडाऱ्यात अशा खेळी खेळली जात आहेत, जिथे नेते स्वतःच्या नव्हे, तर पत्नींच्या विजयासाठी धडपडत आहेत. आता या राजकीय नाट्याचा केंद्रबिंदू आहे माजी आमदारांचा पक्षप्रवेश.
Harshwardhan Sapkal : ईआयसीच्या इतिहासाची पुनरावृत्ती नव्या स्वरूपात
राजकीय समीकरण
कधीकाळी नाराज होऊन दुसऱ्या पक्षात गेलेले एक माजी आमदार. तिथे अपेक्षित यश न मिळाल्याने आता पुन्हा आपल्या जुन्या पक्षाच्या छत्रछायेत परतण्याच्या तयारीत आहेत. पण हा प्रवेश त्यांच्यासाठी नव्हे, तर त्यांच्या पत्नीसाठी आहे. नगरपरिषदेच्या निवडणुकीत पत्नीला उमेदवारी मिळावी, यासाठी ही रणनीती ते आखत आहेत. ‘एका यशस्वी पुरुषामागे स्त्री असते,’ ही म्हण आता उलटी झाली आहे. या माजी आमदारामुळे भंडाऱ्यात मतदारांना एक मोठ्या राज्यव्यापी नेत्याला ‘ना..ना’ म्हणता आले नाही.
या माजी आमदाराने सध्याच्या एका नेत्याला चांगलेच पटवले आहे. परंतु या कृतीमुळे या माजी आमदाराची विश्वासार्हता संपली आहे. जे आपल्या पक्षाचे नाही झाले ते आपले काय होतील, असे सांगत या माजी आमदाच्या प्रवेशाला विरोध केला जात आहे.
हे माजी आमदार आपल्याकडे आले, तर आम्ही काम करणार नाही असे देखील कार्यकर्त्यांनी आपल्या नेत्यांना सांगितले आहे. त्यामुळे सध्यातरी माजी आमदार साहेबांच्या मार्गात अनेक अडचणी आहेत. आता ‘काशी’ला जाऊन गंगास्नान करावे आणि झालेले पाप धुऊन काढावे असा, विचार हे माजी आमदार करीत आहेत.
स्थानिक स्वराज संस्था निवडणुकीत पक्षांतर्गत कलह आणि राजीनाम्यांचा धुरळा उडण्याची शक्यता आहे. कारण, जे नेते स्वतः मैदानात उतरण्याच्या तयारीत होते, त्यांना आता पत्नींना पुढे करावे लागत आहे. यामुळे पक्षांतर्गत स्पर्धा तीव्र होत जाणार आहे.
Mahayuti : राष्ट्रवादीच्या आमदाराने भाजपवर फोडला पाच कोटींचा बॉम्ब
काही नेत्यांनी तर पुष्पा चित्रपटातील नायकाप्रमाणे आपल्या पत्नींना सर्व सुख आणि यश मिळवून देण्याचा प्रण केला आहे. पण, हे यश इतके सहज मिळणार नाही, असे दिसते. विरोध, प्रतिस्पर्ध्यांचे डावपेच आणि निवडणुकीच्या मैदानातील आव्हाने यांचा सामना या माजी आमदाराला आणि त्यांच्या पत्नीला करावा लागणार आहे.
हा सारा राजकीय खेळ आता ‘फॅमिली प्रोग्रॅम’सारखा बनला आहे. माजी आमदार आणि त्यांच्या पत्नीची जोडी निवडणुकीच्या रणांगणात उतरण्याच्या तयारीत आहे. पण, यश मिळवणे इतके सोपे नाही. राजकीय कुरघोडी, विरोधकांचे डाव आणि निवडणुकीतील चुरस यामुळे या माजी आमदाराची धडपड यशस्वी होईल का? याकडे सर्वांचे लक्ष लागले आहे.
