भंडारा नगर परिषदेची निवडणूक रंगतदार होत आहे. या निवडणुकीत आपलं वर्चस्व सिद्ध करण्यासाठी एका नेत्यानं ‘शिवधनुष्य’ उचललं आहे.
काहीही झालं तरी भंडारा जिल्ह्यातील आपलं वर्चस्व गमवायचं नाही. या वर्चस्वासाठी एक नेता सध्या चांगलाच आटापिटा करत आहे. या नेत्याच्या पक्षातील त्याचा ‘राइट हॅन्ड’ त्याला सोडून दुसऱ्या पक्षात गेला आहे. या विश्वासूनं आपल्यासोबत नेत्याच्या ‘सिक्रेट’ व्यवहारांचा चिठ्ठाच नेला आहे. आपल्याजवळ असलेला ‘युजरनेम’ आणि ‘पासवर्ड’ या विश्वासूनं दुसऱ्या पक्षात आल्यानंतर वापरणं सुरू केलं आहे. त्यामुळं आतापर्यंत भंडारा जिल्ह्यात पैशांच्या जबरदस्त ‘इनकम’ मुळं ‘पर्यटन’ करणारा हा नेता अडचणीत सापडत चालला आहे. अशात स्वपक्षाच्या अस्तित्वासाठी धडपड असलेल्या या नेत्यानं भंडारा नगर परिषदेच्या निवडणुकीत नवीन पत्ता फेकला आहे.
एका मोठ्या राजकीय पक्षाच्या काही पदाधिकाऱ्यांना त्यानं खास ऑफर दिली आहे. तुम्ही माझ्याकडं या, अशी ही ऑफर आहे. आपल्याकडं आल्यास दहा लाख मिळतील. गळ्यात दुपट्टा टाकल्यानंतर बोहोनी करतो, असं या नेत्यानं सांगितलं आहे. पक्षात येताच पाच आणि उर्वरित निवडणुकीनंतर पाच अशी दहाची लाच या नेत्यानं भंडाऱ्यातील एका मोठ्या पक्षातील पदाधिकाऱ्यांना ऑफर केली आहे. या नेत्याच्या ‘गेम’मध्ये हे पदाधिकारी फसले आहेत. त्यांनी आपल्या पक्षाच्या पदाधिकाऱ्यांच्या तोंडावर राजीनामा फेकला आहे. मात्र हा राजीनामा फेकताना त्यांना एका गोष्टीचा विसर पडला आहे. देशात आणि राज्यात त्यांचा पक्ष सोडला तर कुणी उरलंय का?
सगळे इकडे, तुम्ही तिकडे
आपल्या पक्षातील राजीनामा फेकत हे काही पदाधिकारी नेत्याकडं जाणार आहे. पण या पदाधिकाऱ्यांचं भविष्यात तेलही गेलं अन् तुपही गेलं अशी अवस्था होण्याची दाट शक्यता आहे. त्याला कारणही तसंच आहे. ज्या नेत्यानं भंडाऱ्यातील मोठ्या पक्षातील पदाधिकाऱ्यांना राजीनामा द्यायला लावला, त्याचाच गेम होणार आहे. या नेत्याच्या पक्षाचं भंडाऱ्यातील अस्तित्व लवकरच धोक्यात आणण्याची तयारी सुरू झाली आहे. तशी ‘फिल्डिंग’ही लागली आहे. त्याला ‘पर्यटन’ करताना साथ देणारे एक एक करीत ‘पिंजऱ्यात’ जाणार आहेत. त्यामुळं आपल्या पक्षातील राजीनामा देऊन हातचं सोडून पळत्याच्या पाठीमागं लागणाऱ्यांना पचतावण्याची वेळ येणार असल्याची चर्चा राजकीय वर्तुळात आहे.
भंडारा नगर परिषदेत सक्रिय असलेल्या पदाधिकाऱ्यांना नेत्यानं ‘दस का दम’ दाखविला आहे. पण भविष्यात याच नेत्याच्या नाकात चौकशी मागे लागल्यामुळं ‘दम’ येणार आहे. याच नेत्याच्या पक्षातील वरिष्ठांनीही त्याबाबत ‘साइड ट्रॅक’ची भूमिका घेतली आहे. भंडारा जिल्ह्यातील राजकीय वर्तुळात खरा बाहुबली कोण? हे सगळ्यांनाच माहिती आहे. मग सुखाचा घास सोडण्याची दुर्बुद्धी काही पदाधिकाऱ्यांना सुचली आहे. ‘दहा’च्या नादात देशात प्रचंड ताकद असलेला पक्ष सोडून हे पदाधिकारी दुसरीकडे जात आहे. दुपट्टा टाकताच त्यांना ‘पाच’ची ‘लाच’ मिळेल हे खरे आहे. पण उर्वरित ‘पाच’ त्यांना मिळतील याची गॅरंटी नाही.
Bhandara Municipal Council : अखेर करण चव्हाण यांची भंडारातून बदली
तिच जागा मिळेल?
इतकेच काय तर आपल्या पक्षाशी धोका केल्यामुळं त्यांना काय काय भोगावं लागू शकते याचा नेम नाही. ज्या नेत्यानं भंडाऱ्यात आपणच ‘किंग’ हे दाखविण्याचा प्रयत्न चालविला आहे, त्याच्याच पक्षाचे साहेब सध्या दिल्लीवारी करीत आहेत. अशात संपूर्ण देशात आपलं ‘नेटवर्क’ मजबूत करणारा पक्ष सोडायचा का? याचा विचार राजीनामा देणाऱ्यांनी करावा, अशी चर्चा आहे. एक वस्तुस्थिती नाकारून चालणार नाही. ‘जानेवाले को कोई रोक नही सकता.’ पण एकदा गेल्यानंतर परत आलेल्या व्यक्तीला तिच जागा, तिच खुर्ची मिळेल याची ‘गॅरंटी’ कोणीच देऊ शकत नाही.
एखाद्या ठिकाणी अनेक खुर्च्या ठेवलेल्या असतात. एक उठून गेला, की त्याच्या मागे असलेले लोक एक एक खुर्ची पुढे सरकतात. मग पुन्हा त्या ठिकाणी परत येणाऱ्याला नवीन जागा शोधत बसावी लागते. आज आपल्या पक्षात मिळणारा सन्मान सोडून हे पदाधिकारी ‘दहा’च्या नादात दुसरीकडे पाहा असं करत आहे. त्यांना भविष्यात सोडून गेलेल्या पक्षात परत यायची इच्छा होईल, असे पक्कं आहे. आज राजीनामा देऊन गेलेले परतही येतील. पण त्यावेळी त्यांना तेच पद आणि तोच सन्मान मिळेल, याची हमी कोणीही देऊ शकत नाही. त्यामुळं राजीनामा देणाऱ्यांनी ‘जोश में नही होश में’ निर्णय घ्यावा, अशी चर्चा भंडाऱ्यात आहे.
