भंडारा नगर परिषदेच्या अध्यक्ष पदासाठी होत असलेली निवडणूक रंगतदार ठरत आहे. प्रचार आता अंतिम टप्प्यात आला आहे.
भंडारा नगर परिषद निवडणुकीत अध्यक्ष पदासाठीची रस्सीखेच रंजक ठरत आहे. अध्यक्ष पदासाठी येथे त्रिकोणी मुकाबला होत आहे. परंतु या युद्धात काँग्रेयच्या जयश्री बोरकर बऱ्यापैकी सरस ठरत आहेत. काँग्रेसचे आमदार नाना पटोले यांच्या विश्वासू सहकारी आणि कट्टर काँग्रेसी असलेल्या बोरकर यांना भंडाऱ्यातून संधी मिळाली आहे. पक्षातील आपलं कतृत्व बोरकर यांनी आधीच सिद्ध करून दाखवलं आहे. लोकसभा निवडणुकीत प्रशांत पडोळे यांना भक्कम मतं मिळाली.
पडोळे यांना मिळालेल्या मतांच्या आकडेवारीचा लेखाजोखा काँग्रेसजवळ आहे. त्यामुळे बोरकर यांनी आपल्या भागातून किती मतं काँग्रेसला मिळवून दिली, हे काँग्रेसला ठाऊक होतं. परिणामी नाना पटोले यांनी बोरकर यांना उमेदवारी द्यावी, ही आपली भूमिका ठामपणे रेटली. आता बोरकर या निवडणूक रिंगणात आहेत. बोरकर या घराणेशाहीतून पुढे आलेल्या नाहीत. कोणी ‘गॉडफादर’ आहे, म्हणून त्यांना यश मिळेल, असंही नाही.
चौफेर जनसंपर्क
जयश्री बोरकर यांचा भंडारा नगर परिषदेच्या क्षेत्रात दांडगा जनसंपर्क आहे. निवडणूक नव्हती तरी बोरकर यांनी जनतेशी नाळ जुळवून ठेवली होती. जनतेची कामं कशी होतील, यासाठी त्या आग्रही दिसायच्या. राष्ट्रवादी काँग्रेस अजित पवार गटाच्या सुषमा साखकर येथुन मैदानात आहेत. शिवसेना एकनाथ शिंदे गटाच्या डॉ. अश्विनी भोंडेकरही पूर्ण ताकद लावून आहेत. अशात जयश्री बोरकर या दोन्ही प्रतिस्पर्धी उमेदवारांना चांगलीच टक्कर देत असल्याचं दिसत आहे.
निवडणुकीच्या प्रचारासाठी काही नेते चित्रपट अभिनेता, अभिनेत्रींना आणत आहे. सत्ताधारी पक्षांकडून निधीची भीती दाखवली जात आहे. दुसऱ्या पक्षाचा नगराध्यक्ष झाला तर असा अध्यक्ष निधी आणू शकतो का? अशी अप्रत्यक्ष भीती मतदारांना दाखवली जात आहे. या सगळ्या हल्ल्यांना जयश्री बोरकर चोखपणे प्रत्युत्तर देताना दिसत आहे.
केंद्र किंवा राज्यात सत्ता नसतानाही जयश्री बोरकर केवळ आपल्या ‘ग्राऊंड कनेक्ट’च्या जोरावर मतदारांपर्यंत पोहोचत आहेत. आता निवडणुकीत काही उमेदवार अध्यक्षपदावर दावा करीत आहेत. मतदार अडचणीत होते, तेव्हा ही मंडळी कुठे होती, असा सवालही बोरकर यांचे समर्थक करीत आहेत. त्यामुळं पटोले यांनी खेळलेलं हे ‘ट्रम्पकार्ड’ कसं यशस्वी ठरणार, याकडं राजकीय वर्तुळाचं लक्ष लागलं आहे.
